थारु कल्याणकारिणी सभा जिल्ला अधिवेशनमे जुटल
धनगढी,१२ सावन । थारु कल्याणकारिणी सभा कैलाली जिल्ला अधिवेशनके तयारीमे जुटल बा ।
भदौ २५ गते भित्रे हुइना जिल्ला अधिवेशनके लाग क्षेत्रीय अधिवेशन, नगरपालिका, गाउँपालिका स्तरीय अधिवेशन तयारी तिब्र गतिमे हुइटी रहल जिल्ला सचिव माधव चौधरी बटैलै । जिल्ला अधिवेशन तयारीके लाग सावन २५ गतेसम सक्कु नगरपालिका ओ गाउँपालिका स्तरीय समितिहे पत्र पठाइल उहाँ कहलै ।
ओस्टेक भदौ १० गतेभित्तर क्षेत्रीय अधिवेशन कैसेक्ना सचिव चौधरी कहलै । जेम्ने शनिच्चरके रोज केल कैलाली क्षेत्र नम्बर ४ के क्षेत्रीय अधिवेशन करल उहाँ कहलै । जिल्लाके आउर बाँकी चार क्षेत्रमेफे पत्रचार करल ओरसे उहाँफे क्षेत्रीय अधिवेशनके तयारी हुइटी रहल सचिव जनैलै ।
थाकासके केन्द्रीय निर्णय अनुसार जिल्ला असार महिनामे जिल्ला अधिवेशन कैना कहलेसेफे बर्षा ओ खेत लगाई सुरु हुइल ओरसे भदौ २५ भित्तर करेक लाग सदस्य नविकारणके काम, लौव सदस्यता वितरणके कामफे तिब्र पारल जिल्ला कोषाध्यक्ष इन्दु चौधरी बटैली । अधिकारके आन्दोलन करेबेर जिल्ला सभापति लाहुराम चौधरी टिकापुर घटनाके आरोपमे हिरासतमे परल ओ उपसभापति जोधी प्रसाद चौधरीके बस दुर्घटनासे निधन हुइलक कारण तोकल कार्यकालसे एक बर्ष ढिला अधिवेशन हुइटी बा ।
ओस्टेक जिल्ला अधिवेशन तयारीके लाग शनिच्चरके रोज गोदावरी नगरपालिका–८ जमुनाभारीमे थाकास क्षेत्र नम्बर ४ के क्षेत्रीय अधिवेशन हुइल बा ।
अधिवेशन लाल बहादुर चौधरीके अध्यक्षतामे ११ सदस्यीय क्षेत्रीय समिति चयन करले बा । जेम्ने क्षेत्रीय सचिव, कोषाध्यक्ष ओ सहसचिवमे क्रमश माया चौधरी, तबिराम चौधरी ओ तेजराम चौधरी चयन हुइल बाटै । ओस्टेक सदस्यमे भिमबहादुर चौधरी, कालीराम चौधरी, श्रीराम चौधरी, तारा प्रसाद चौधरी, मंगलराम चौधरी चयन हुइल बाटै । क्षेत्रीय अधिवेशनसे जिल्ला पार्षदफे चयन कैगिल बा । जिल्ला पार्षदमे सितादेवी चौधरी, रामकृष्णी चौधरी प्रदेशी चौधरी ओ खुशीराम चौधरी रहल बाटै । अधिवेशनसे सल्लाहकार समितिफे चयन कैले बा । जेम्ने कर्मराम चौधरी, लौटन चौधरी ओ रजनी चौधरी रहल बाटै ।
थारु कल्याणकारिणी सभा कैलालीके सचिव माधव चौधरीके अध्यक्षतामे हुइल कार्यक्रमके वडका पहुना थारु नेता तथा प्रदेश उम्मेदवार यज्ञराज चौधरी रहिट । कार्यक्रममे थारु नेता मनिराम चौधरी, गोदारी नपा–८ के वडा सदस्य राजेश चौधरी, सिता चौधरी लगायत मन्तव्य व्यक्त करले रहिट । कार्यक्रमके संचालन थाकासके जिल्ला कोषाध्यक्ष इन्दु चौधरी करले रहिट ।
कार्यक्रममे थारु समुदायके पहिचान, अधिकारके बाट ओ टीकापुर घटनाके आरोपितहुकनके बारे छलफल हुइल रहे । ओस्टेक टिकापुर घटनाके आरोप करागार रहल राजबन्दीहुकनके यिहे सावन १६ गते पेशी रहल ओरसे छलफल कैके जैना बारे छलफल फे हुइल रहे ।
