कैलाली अदालतसे एक हजार मुद्धा फछ्र्यौट
धनगढी, १२ सावन । कैलाली जिल्ला अदालतसे आव २०७४/०७५ के असार मसान्तसम तमान प्रकृतिके करिब एक हजार मुद्धा फछ्र्यौट करले बा ।
अदालतके श्रेष्तेदार इन्दबहादुर कडायत देवानी, फौजदारी लगायत अन्य प्रकृतिके करिब एक हजार मुद्धा फछ्र्यौट करल जानकारी डेलै । उहाँ देवानी, फौजदारी, बन्दी प्रत्यक्षीकरण, निषेधाज्ञा लगायत दर्ता हुइल एकहजार ७७६ मुद्धा मध्ये ९९८ मुद्धा फछ्र्याैट हुइल जनकारी डेलै ।
कैलाली जिल्ला अदालतमे आर्थिक आव २०७३/०७४ मे जिम्मेवारी सरके आइल २७४ ओ आव २०७४/०७५ मे चारसय थप लौव सहित जम्मा ६७४ ठो देवानी ओरके मुद्धा दर्ता हुइल रहे । ओम्नेसे आव २०७४/०७५ के असार मसान्तसम ३३८ मुद्धा फछ्र्यौट हुइल बा कलेसे ३४७ मुद्धा फछ्र्यौट हुइना बाँकी रहल बा ।
ओस्टके फौजदारी मुद्धा ओर आव २०७३/०७४ मे जिम्मेवारी सरके आइल २९७ ओ आव २०७४/०७५ के असार मसान्तसमके ७७० लौव मुद्धा सहित जम्मा एक हजार ६७ ठो मुद्धा दर्ता हुइलमे ६५१ मुद्धा फछ्र्यौट हुइलमे ४१६ मुद्धा फछ्र्याैट हुइना बाँकी रहल बा ।
ओस्टके बन्दी प्रत्यक्षीकरण, निषेधाज्ञा लगायत अन्य मुद्धा ३५ ठो दर्ता हुइलमे १९ मुद्धा फछ्र्यौट हुइलमे १६ मुद्धा फछ्र्यौट हुइना बाँकी रहल श्रेष्तेदार कडायत जानकारी करैलै ।
कैलाली जिल्ला अदालत कैलालीमे आर्थिक वर्ष २०७४/०७५ वार्षिक प्रतिवेदनमे लेनदेन, जग्गा खिचलो सम्बन्धी १५२ मुद्धा मध्ये ६९ ठो मुद्धाके फछ्र्यौट हुइलमे ३ मुद्धा फछ्र्यौट हुइना बाँकी रहल उल्लेख बा ।
ओस्टके अंश, नाता कायम, बहुविवाह, सम्बन्ध विच्छेदके ८७ मुद्धा मध्ये ५१ ठो मुद्धा फछ्र्यौट होके ३६ मुद्धा फछ्र्यौट हुइना बाँकी रहल बा । कलेसे चोरी, जबरजस्तीके ५२ मुद्धा मध्ये २९ मुद्धा फछ्र्यौट हुइलमे २३ मुद्धा फछ्र्याैट हुइना बाँकी रहल बा ।
ओस्टके कर्तव्य ज्यान मर्ना उद्योग, सवारी ज्यानके ११४ मुद्धा मध्ये ९ मुद्धा फछ्र्यौट होके १६ ठो बाँकी, लागु औषध, गाँजा चरेसके ७३ ठो मध्ये ५३ ठो मुद्धाके फसैला हुइल बा कलेसे २० बाँकी रहल बा ।
ओस्टके अदालके अवहेलना, करकाप, जालसाजी लगायतके ३०७ मुद्धा मध्ये २०१ मुद्धाके फैसला हुइलमे १०६ मुद्धाके फैसला हुइना बाँकी रहल बा । कलेसे मिलापत्र, फैसला बदरके २२७ ठो मुद्धा मध्ये ६२ के फैसला ओ १६५ ठो मुद्धाके फैसला हुइना बाँकी रहल बा ।
यहोर गैल आर्थिक बरससे ढिउर मुद्धा दर्ता हुइल जिल्ला अदालत कैलाली जनैले बा । जनशक्ति अभावके बिच न्यायधिश तथा अन्य कर्मचारी स्थानीय, प्रदेश ओ प्रतिनिधि चुनावमे खटपटन हुइ परल ओरसे मुद्धा फछ्र्यौटमे ढिलाई हुइल मुख्य न्यायधिश विष्णु प्रसाद अर्याल बटैलै ।
जिल्ला अदालतमे तिन जने न्यायधिशके दरबन्दी हुइलसे फेन करिब एक बरससे दुई जने न्यायधिश किल कार्यरत रहल ओरसे फेन आवश्यक कार्यसम्पादन हुइ नाइ सेकल जनाइल बा ।
ओस्टके, कैलाली जिल्ला अदालतसे फरार व्यक्तिसे ७ करोड ढिउर जरिवाना उठैना बाँकी रहल जनाइल बा । उक्त जरिवाना अदालत स्थापना हुइलठनसे होवई ।
गैल आर्थिक बरसमे ६ लाख ८ हजार ५ सय २५ रुपैया असुल करलेसे फेन आभिन सात करोड २४ लाख ८३ हजार ६ सय ६१ रुपैया संकलन कैना बाँकी रहल अदालतके तहसिलदार नवराज जोशी जानकारी डेलै ।
