कैलारी गाउँपालिकामे धान दिवस तथा रोपाइँ महोत्सव हुइना
धनगढी, १४ असार । कैलारी गाउँपालिकामे १५औं राष्ट्रिय धान दिवस तथा रोपाइँ महोत्सव २०७५ हुइना बतागिल बा ।
गाउँपालिकाके वडा नं. ७ अन्र्तगतके बर्का बसन्तामे १५औं राष्ट्रिय धान दिवस तथा रोपाइँ महोत्सव २०७५ हुइना जनाइल बा । ‘धान उत्पादनमे वृद्धि, राष्ट्रके समृद्धि कना’ मूल नारा सहित हुइना कार्यक्रमके उद्घाटन भुमि व्यवस्था, कृषि तथा सहकारी मन्त्री बिनिता चौधरीसे हुइना जनाइल बा ।
प्रधानमन्त्री कृषि आधुनिकीकरण परियोजना अन्र्तगत गाउँपालिकाके वडा नं. ७ मे यिहे बरससे धान ब्लक विस्तार हुइल बा । धान ब्लकके उद्घाटनसंगे राष्ट्रिय धान दिवस तथा रोपाइँ महोत्सव कार्यक्रमके आयोजना करल हरियाली सामुदायिक कृषि सहकारी संस्थाके अध्यक्ष लेखराम चौधरी जानकारी डेलै । कुछ दिन आघे संस्थासे गाउँपालिकाके अनुदानमे प्रधानमन्त्री कृषि आधुनिकीकरण परियोजना अन्र्तगत कृषकहुक्रनहे कृषि उपकरण फेन हस्तान्तरण करले बा ।
यहोर १५औं राष्ट्रिय धान दिवस तथा रोपाइँ महोत्सव २०७५ के पुरा तयारी हुइल वडा नं. ७ के वडा अध्यक्ष कमलप्रसाद चौधरी जानकारी डेलै । देशमे हरेक बरस असार १५ गते राष्ट्रिय धान दिवस तथा रोपाइँ महोत्सवके रुपमे मनैना करगिल बा ।
