कैलारी गाउँपालिकाके ३ सय योजना पुरा
हसुलिया, ९ असार । कैलारी गाउँपालिका तीनसयसे ढिउर योजना सम्पन्न करले बा । जौन योजना सम्पन्न करेक लाग गाउँपालिका १८ करोड ५४ लाख ९९ हजार बराबरके बजेट खर्च करले बा ।
चालु आर्थिक वर्ष २०७४/०७५ मे गाउँपालिका भित्तर सञ्चालित करिब तीनसयसे ढिउर योजना सम्पन्नके लाग उ बराबर रकम खर्च करल गाउँपालिकाके कार्यालय जनैले बा । गाउँपालिकासे भौतिक पूर्वाधार, सिंचाई, कृर्षि, सामाजिक विकास, आर्थिक विकास, आर्यआर्जन लगायत करिब तीनसयसे ढिउर योजना सञ्चालन करले रहे । जौन योजना सफलता पूर्वक सम्पन्न हुइल फेन गाउँपालिका जनैले बा ।
गाउँपालिकाके अध्यक्ष लाजुराम चौधरी गाउँपालिका भित्तर सञ्चालित सक्कु योजना सफलता पूर्वक सम्पन्न हुइल बटैलै । गाउँपालिकासे सञ्चालित भौतिक पूर्वाधार अन्र्तगत भवन निर्माण, पुलपुलेसा, कालोपत्रे, ग्राभेल, सिंचाई ओर डुँड, बोरिङ, बाँध, सामाजिक विकास ओर सामाजिक सेवा तथा क्षमता विकास, आर्थिक विकास लगायतके योजना सफलतापूर्वक सम्पन्न हुइल अध्यक्ष चौधरी बटैलै । कलेसे अध्यक्ष चौधरी अइना आर्थिक वर्ष २०७५/०७६ के बजेटमे गाउँपालिका भित्तरके भौतिक पूर्वाधारहे ढिउर प्राथामिकता डेहल बटैलै । उहाँ भौतिक पूर्वाधारओर कुल बजेटके ७० प्रतिशत वजेट विनियोजन कैना लक्ष्य रहल बटैलै । कलेसे लक्षित समूह ओ प्रवर्धानात्मक विकासके लाग १५÷१५ प्रतिशत बजेट विनियोजन कैना समेत जानकारी डेलै ।
यहोर गाउँपालिकासे सञ्चालित योजना सम्पन्न हुइलसंगे स्थानीयहुक्रे गाउँघरमे विकासके अनुभव महसुश करे लागल बाटै । कैलारी गाउँपालिका वडा नं. ७ के स्थानीय नारायण चौधरी एक बरस भित्रे गाउँघरमे कुछ विकासके महसुस हुइल बटैलै । यकर साथे उहाँ अइना दिनमे गाउँपालिकासे यी मेरके योजना सम्पन्न करी कलेसे गाउँघरके विकास हुइना ढिउर समय नाइ लग्ना विश्वास समेत व्यक्त करल रहिट ।
गाउँपालिकासे चालु आर्थिक वर्ष २०७४/०७५ मे सञ्चालित आयोजना अन्र्तगत भौतिक पूर्वाधारओर भवन निर्माणके लाग एक करोड ५० लाख, ग्राभेलके लाग पाँच करोड ३० लाख, कालोपत्रेके लाग एक करोड बजेट विनियोजन करले रहे ।
ओस्टके सिंचाईके लाग ६४ लाख २० हजार, मर्मत संभारओर २३ लाख २० हजार, खानेपानीके लाग १५ लाख ओ सरसफाई ओर ३६ लाख रकम विनियोजन करले रहे । ओस्टके विशेष कार्यक्रम अन्र्तगत ४५ लाख, ह्युमपाईप खरिदके लाग ५० लाख, कल्भर्ट, स्ल्याप निर्माणके लाग ८० लाख, झोलुङगेपुल निर्माण ओर २५ लाख, सार्वजनिक सेवा तथा क्षमता विकासके लाग १२ लाख, मानव संसाधन क्षमता विकास ओर २९ लाख बराबर बजेट विनियोजन करले रहे ।
कलेसे आर्थिक विकासओर ३४ लाख ५० हजार, पशु कार्यक्रमके लाग १९ लाख ५० हजार, घरेलु तथा साना उद्योगके लाग ८६ लाख ७५ हजार ओ विधेयक समिति ओर १४ लाख बजेट विनियोजक करले रहे ।
