स्थानीय स्तरके पर्यटकीय क्षेत्रके पचारप्रसार से गाउँघरमे पर्यटक भित्र्याई सेकजैना
रतनपुर, २ असार । स्थानीय स्तरमे रहल धार्मिक पर्यटकीय क्षेत्रके स्तरोन्नति तथा प्रचारप्रसारसे गाउँघरमे धार्मिक पर्यटक भित्र्याई सेकजैना प्रदेश प्रमुख मोहनराज मल्ल बटैले बाटै ।
शनिच्चरके रोज कैलारी गाउँपालिका वडा नं. ७ बर्का बसन्ता स्थित गणेशदेव मन्दिरमे मूर्ति स्थापना तथा ग्रामिण पर्यटन प्रवद्र्धन कार्यक्रममे प्रदेश नं. ७ के प्रदेश प्रमुख मल्ल धार्मिक पर्यटकीय क्षेत्रके स्तरउन्नति तथा प्रचारप्रसारसे गाउँघरमे धार्मिक पर्यटक भित्र्याके आर्थिक लाभ लेहे सेकजैना बटाइल रहिट ।
कार्यक्रमके बर्का पहुना समेत रहल प्रदेश प्रमुख मल्ल प्रदेश ७ हे धार्मिक पर्यटकीय क्षेत्रके रुपमे विकास कैना बटाइल रहिट । प्रदेश प्रमुख मल्ल प्रदेश नं. ७ मे प्रसिद्ध धार्मिक पर्यटकीय क्षेत्रके रुपमे खप्तड, शैलेश्वरी, उग्रतारा, बेहडाबाबा लगायत तमान धार्मिक क्षेत्र रहल बटैलै । मने प्रचार प्रसार तथा धार्मिक पर्यटकहुक्रनके लाग उचित बासस्थान यातायात नाइ होके ओझेल पर्ना बटैलै ।
मने प्रदेश प्रमुख मल्ल प्रदेश नं. ७ हे धार्मिक पर्यटकीय क्षेत्रके रुपमे विकासके लाग तमान योजना लन्ना बटैलै । यकरसंगे स्थानीय स्तरमे रहल धार्मिक क्षेत्रके प्रचार प्रसार ओ विकासमे जोड डेना उहाँ बटाइल रहिट ।
यिहे बिच प्रदेश प्रमुख मल्लहे गणेशदेव मन्दिर सामुदायिक विकास मञ्चसे तमान माग सहित ज्ञापन पत्र बुझागिल रहे । मञ्चके अध्यक्ष खुशीराम चौधरी जिर्ण अवस्थामे रहल मन्दिरहे संरक्षण सम्बद्र्धनके लाग तारबार तथा पर्खाल निर्माण, गेट तथा भक्तजनहुक्रनके लाग भजनकिर्तनके लाग सभाहल तथा बासके लाग भवन लगायतके माग सहित ज्ञापन पत्र बुझाइल रहिट । ज्ञापनपत्र बुझ्टी प्रदेश प्रमुख मल्ल आपन ओरसे सेक्ना सहयोग कैना प्रतिवद्धता जनाइल रहिट ।
कार्यक्रममे वडा नं. ५ के वडा अध्यक्ष विष्णु प्रसाद चौधरी गाउँपालिका भित्तर रहल सक्कु धार्मिक क्षेत्रहे गाउँपालिकासे संरक्षण सम्बद्र्धन तथा धार्मिक पर्यटकीय क्षेत्रके रुपमे विकास कैना लक्ष्य लेहल बटैलै । अध्यक्ष चौधरी गाउँपालिका भित्तर रहल वनदेवी मन्दिरहे धार्मिक पर्यटकीय क्षेत्रके रुपमे विकास करे लागल जानकारी करैटी अन्य धार्मिक क्षेत्रहे पहिचान कैटी संरक्षण सम्वद्र्धन तथा प्रचारप्रसार कैना जिम्मेवारी समेत गाउँपालिकाके रहल बटाइल रहिट ।
मन्दिर व्यवस्थापन समितिके संरक्षक तथा सल्लाहकार चन्द्रसिंह चौधरी मन्दिर संरक्षण सम्बद्र्धनके लाग अपने लगानीमे गणेशदेव रहल स्थानमे मन्दिर स्थापना करल बटैलै । यकर साथे सल्लाहकार चौधरी गाउँघरके धार्मिक पर्यटकीय क्षेत्रके थप संरक्षण सम्वद्र्धन तथा प्रचारप्रसारके लाग स्थानीय तहके मुख्य जिम्मेवारी रहल बटैलै ।
मन्दिरमे गणेश भगवानके मुर्ति विधिवत रुपमे स्थापना करगिल रहे । कलेसे उ मूर्तिहे प्रदेश प्रमुख मल्ल अनावरण करल रहिट । गणेशदेव मन्दिर सामुदायिक विकास मञ्चके अध्यक्ष खुशीराम चौधरीके घरगोसियाइमे कार्यक्रम हुइल रहे ।
कार्यक्रममे समाजसेवी तथा वुद्धिजिवी फोनीराम चौधरी, कलेसु चौधरी, नेपाल तरुण दल कैलाली जिल्ला अध्यक्ष दिपेन्द्र बम, मालिका कलेजके क्याम्पस प्रमुख भीम बोहरा लगायतके पहुना रहल रहिट । कलेसे कार्यक्रममे भक्तजन, गाउँक स्थानीय लगायत सर्वसाधारण हुक्रनके उपस्थिति रहल रहे ।
