मोटरसाईकल चोरीमे संलग्न छ जनहनहे सार्वजनिक
धनगढी,२७ जेठ । जिल्ला प्रहरी कार्यालय कैलाली प्रहरी मोटरसाईकल चोरीमे संलग्न छ जनहनहे सार्वजनिक करले बा । मोटरसाईकल चोरी करके खरिद विक्री कैना समुहके छ जनहनहे टमान ठाउँसे पक्राउ करके अँटवार सार्वजनिक करल हो ।
प्रहरी ६ दिनमे सात ठो मोटरसाईकल बरामद करल जनैले बा । प्रहरीके अनुसार छ जाने मन्से चार जनहनहे मुख्य चोर एक जाने चोरीके मोटरसाईकल वेचविखन कैना ओ एक एक जानेक घरसे मोटरसाईकल वरामद करल हो ।
चोरीके मोटरसाईकल विक्री करुइयामे धनगढी–६ मटियारीके २१ वर्षीय पेन्टिङके काम कैना गोरे कहुइया रामभजन राना, सुदुरपश्चिम समाज नामक संस्थामे काम कैना कैलारी गाउँपालिका १८ वर्षीय सन्जु चौधरी, धनगढी ६ मटियारीके आलमुनियक पसलमे काम कैना २० वर्षीय सुरज राना मोटरसाईकल चोरी कैना चोर रहल प्रहरी जनैले बा ।
कञ्चनपुरके वेदकोट नगरपालिका–५ के २८ वर्षीय पदम धानुक अपने ग्यारेज रहल ओ घोडाघोडी नगरपालिका–९ के किसन चौधरी ग्यारेजमे काम करटी चोरीके मोटरसाईकल वेचविखन करटी आइल रहिट ।
ओइने रातके समयमे १० वजेसे २ वजेसम धनगढीके मुख्य स्थानमे धारल मोटरसाईकल चोरी करटी आइल रहिट । हसनपुर वसपार्क पाछे, चटकपुर, क्याम्पसरोड लगायतके स्थानसे ढेर मोटरसाईकल चोरी करल ओइने स्विकारल प्रहरी जनैले बा । ओइने सवसे ढेर पल्सर ओकरपाछे अपाची, सुपर स्प्लेन्डर लगायतके मोटरसाईकल चोरी करटी आइल रहिट ।
प्रहरीके अनुसार ओइने १५ से ढेर मोटरसाईकल चोरी करके बेचल जनैले बा । ओइने चोरी करके कञ्चनपुर, बर्दिया, डडेल्धुरा, अछाम लगायतके जिल्लामे विक्री कैना करल रहिट । कैलाली प्रहरी प्रमुख तथा प्रहरी उपरिक्षक विनोद घिमिरे कहलै ‘चोरी करुइयाहे केल नाही, चोरीके सामान किनुइयाहेफे कार्वाहीके दायरामे नानजाई ।
उहाँ चोरीके मोटरसाईकल खरिद करुइया व्यक्तीनके फे खोजी कार्य हुइटी रहल बटैलै । जिल्ला प्रहरी कार्यालयमे अभिन सात ठो मोटरसाइकल चोरी हुइल निवेदन परल ओरसे उ फे हाली बरामद कैना बटैलै ।
