सिकलसेल निदानके लाग १० लाख बजेट विनियोजन
धनगढी, १० बैशाख । प्रदेश नं. ७ के चालु आव ०७४/०७५ के आंशिक बजेट प्रस्तुत हुइल बा । आर्थिक मामिला तथा योजना मन्त्री झपट बोहरा अट्वारके रोज बैठल प्रदेश संसद बैठकके विशेष समयमे १ अर्व २ करोड ५ लाख बराबरके आंशिक बजेट प्रस्तुत कर्ले बाटै ।
मन्त्री बोहरा आपन बजेट व्यक्तव्यमे संघीयता कार्यान्वयनमे सहयोग कर्र्ना, प्रदेशस्तरीय निकायहुकनके संरचनाके व्यवस्थापन कर्र्ना, दिगो, समावेशी ओ उच्चदरके आर्थिक वृद्धि हासिल कर्ना प्रस्थानविन्दु तय कर्ना, सक्कु क्षेत्रके समानुपातिक विकास करके समष्टिगत आर्थिक स्थायित्व कायम कर्ना ओ विकास प्रक्रियामे अपनत्वबोध कराइक लाग जनसहभागिता सुनिश्चित करैना बजेटके उदेश्य रहल उल्लेख कर्लै ।
उहाँ संघीयता कार्यान्वयनके लाग कानूनी तथा संस्थागत संरचना निर्माण, अल्पकालीन, मध्यमकालीन तथा दीर्घकालिन आवधिक योजना निर्माण कर्ना बजेटके प्राथमिकताके विषय रहल फेन बटैलै । साथे गरिबी न्यूनीकरण कर्ना लक्षित कार्यक्रम, कृषिमे आत्मनिर्भरता, शिक्षा, स्वास्थ्य, खानेपानी ओ सरसफाई, विकासके पूर्वाधारके प्रारुप तय कर्र्ना, जल, जंगल, जमिन, जडिबुटी, उद्योग ओ पर्यटनके वैज्ञानिक विकास कर्र्ना आर्थिक असमानता हटाके समावेशी विकास कर्ना ओ प्रचुर सम्भावना रहल क्षेत्र पहिचान कर्ना फेन चालु बजेटके प्राथमिकताके क्षेत्र रहल मन्त्री बोहरा उल्लेख कर्लै ।
ओस्टके, बजेट भाषणमार्फत मन्त्री बोहरा कृषि क्षेत्रके विकासके लाग ‘परिवर्तित कृषि प्रणाली, मौसम सुहैना खेती, माटी सुहैना उत्पादन, उत्पादन अनुसारके बजार’ कना मूल नाराके सहित ‘मुख्यमन्त्री कृषि कार्यक्रम’ सञ्चालन कर्ना बटैलै । जेकर लाग चालु आवमे ५० लाख बिनियोजन करल उहाँ जनैलै । ९ औं जिल्लामे शित भण्डार स्थापना कर्ना फेन उहााके कहाई रहे ।
मुख्यमन्त्री राहत कोष, ५० लाखके आकस्मिक कोष खडा कर्ना बटागिल बा । मुख्यमन्त्रीसे सोझे जनताहुकनके गुनासो सुनेक लाग ‘हेल्लो सिएम कार्यक्रम’ सञ्चालन कर्ना फेन मन्त्री बोहरा आपन भाषणमे उल्लेख कर्लै ।
पाँच बरसभिट्टर प्रदेशहे पूर्ण साक्षर प्रदेश बनैना, ‘फोहरमुक्त स्वच्छता, प्रदेश नं. ७ के प्रतिवद्धता’ कार्यक्रम सञ्चालन कर्ना जनागिल बा ।
एकिकृत पूर्वाधार विकास करके नमूनाके रुपमे स्मार्ट भिलेज ओ नयाँ शहर स्थापना कर्ना सम्भाव्यता अध्ययन सुरु कर्ना बजेट बिनियोजन हुइल मन्त्री बोहरा बटैलै ।
लगानीमैत्री वातावरण निर्माण संगे प्रदेशमे एक व्यक्ति एक बैंक खाताके अवधारणाहे सार्थकता प्रदान करेक लाग वित्तीय साक्षरता कार्यक्रम सञ्चालन कर्ना मन्त्री बोहरा आपन भाषणमे समावेश कर्लै ।
ओस्टके, थारु समुदायमे डेखा परल सिकलसेल एनिमिया रोगके औषधोपचारके लाग १० लाख बिनियोजन
करगिल बा । मुक्तकमैया, हलिया, भूमीहिन, सुकुमवासी, बादी समुदायके व्यवस्थापनके लाग भूमी व्यवस्थापन कार्यक्रम सञ्चालन कर्ना जनागिल बा
