कैलारी गाउँपालिका अन्र्तगत ८५ प्रतिशत भौतिक पूर्वाधार योजनाके काम पुरा

हसुलिया, २४ चैत्र । कैलारी गाउँपालिका अन्र्तगत ८५ प्रतिशत भौतिक पूर्वाधार योजनाके काम पुरा हुइल पागिल बा ।

शुकके रोज गाउँपालिका स्तरीय परियोजनाके स्थलगत अनुगनसे भौतिक पूर्वाधार अन्र्तगतके उक्त योजनाके कार्य करिब ८५ प्रतिशत पुरा हुइल पाइल हो । कैलारी गाउँपालिकाके उपाध्यक्ष तथा अनुगमन टोली संयोजक लक्ष्मी सत्गौंवा भौतिक पूर्वाधार अन्र्तगतके करिब ८५ प्रतिशत योजनाके काम सम्पन्न हुइल बटैली । बाँकी कार्य फेन उहाँ तिव्र रुपमे हुइटी रहल जनैली । यकर साथे उपाध्यक्ष सत्गौंवा काम फेन समग्र रुपमे मजासे सम्पन्न हुइटी रहल ओ गुणस्तरीय रहल बटैली ।

कैलारी गाउँपालिकाके प्रशासकीय अधिकृत धर्म नन्द भट्ट समग्रमे गाउँपालिका अन्र्तगत भौतिक पूर्वाधारके योजना मजासे सम्पन्न हुइटी रहल बटैलै । गाउँपालिकाके एकाध योजना बिनियोजन करल बजेटसे ढिउर लगानी हुइ पुगलमे रुकल बा । मने उ योजनाहे फेन अधिकृत भट्ट गाउँपालिकाके सम्पूरक कोष मार्फत सम्पन्न कैना उहीसे नाइ हुइलेसे फेन अगामी आर्थिक वर्षमे बजेट विनियोजन कैके सम्पन्न कैना बटैलै ।

गाउँपालिकासे भौतिक पूर्वाधार योजना अन्र्तगत पुलपुलेसा, ग्राभेल, तत्बन्ध, सडक कालोपत्रे, पुलपुलेसा मर्मत सम्भार, कैलारी गापा वडा नं. १ अन्र्तगत वनदेवी मन्दिरहे धार्मिक तथा पर्यटकीय क्षेत्रके रुपमे विकास लगायत तमान वडाके गाउँमे सामुदायिक भवन निर्माणहे प्राथमिकता डेले बा ।

गाउँ पालिकासे चालु आव २०७४/०७५ अन्र्तगतके करिब चारसय योजनाके लाग कुल बजेट २८ करोड मध्ये ६० प्रतिशत बजेट भौतिक पूर्वाधारके लाग विनियोजन करल गाउँपालिकाके सूचना अधिकारी बलराम चौधरी जानकारी डेलै ।

यहोर कार्यपालिका सदस्य तथा अनुगमन टोली सदस्य खडकसिंह कामी गाउँपालिकासे निर्माण हुइटी रहल चालु आवके योजना मजासे सम्पन्न हुइटी रहल बटैलै । मने कही कही ठाउँमे उहाँ उपभोक्ताहुक्रनसे जनगुनासो फेन आइल बटैलै । मने उहाँ काम करेबर कुछ समस्या ओ त्रुटी अइलेसे फेन आगामी दिनमे गाउँपालिका उहीहे सिकाईके रुपमे लेहे पर्ना ओ सुधार कैना आवश्यक रहल बटैलै । ओस्टके वडा नं. ४ के वडा सदस्य मोहनलाल चौधरी समग्रमे अनुगमन करल योजना मजा रहल बटैलै । मने कुछ ठाउँसे जनगुनासो आइल बटैटी उहीहे अगामी दिनमे सुधार कैटी लैजैना बटैलै ।

ओस्टके वडा नं. ६ के वडा सदस्य महाबिर चौधरी गाउँपालिकाके पहिल योजना ओ पहिल कार्य रहल ओरसे काम करेबर कुछ समस्या ओ कुछ कमीकमजोरी अइना स्वाभाविक रहल बटैलै । मने उहाँ उक्त कमीकमजोरीहे पहिल सिकाईके रुपमे लेटी अइना दिनमे काम कैनामे सजिलो हुइना विश्वास व्यक्त करलै ।

अनुगमन टोलीमे वडा नंं. ७ के वडा सदस्य मुसम्फी चौधरी, ३ के वडा सदस्य रञ्जीता चौधरी, २ के लक्ष्मी चौधरी, प्राविधिक सुनील चौधरी लगायत अन्य प्रतिनिधीहुक्रनके सहभागिता रहल रहे ।

अनुगमन टोलीसे गाउँपालिका अन्र्तगत तमान वडामे निर्माण हुइटी रहल सामुदायिक भवन, ग्राभेल सडक, कालोपत्रे, पुलपुलेसा लगायतके अनुगमन करगिल रहे ।