स्मार्ट सोसाइटी नेपालसे सञ्चालित तालिमके अनुगमन
हसुलिया, २४ चैत्र । स्मार्ट सोसाइटी नेपाल पवेरासे सञ्चालित तमान मेरिक तालिमके विफेक रोज अनुगमन करगिल बा ।
क्षमता विकास तथा रोजगारी कार्यक्रम अन्र्तगत कैलारी गाउँपालिकाके तमान वार्डमे सञ्चालित तालिम कैलारी गाउँपालिकाके उपाध्यक्ष लक्ष्मी सत्गौंवाके नेतृत्वमे संयुक्त अनुगमन करगिल हो । कैलारी गाउँपालिका पाँच बरस भित्रे गाउँ पालिका भित्तर रहल वेरोजगार युवाहुक्रनहे रोजगार सृजना कैना लक्ष्य लेहल बा । जौन लक्ष्य अनुसार गाउँपालिकासे तमान गैरसरकारी संघ संस्थासे समन्वय ओ सहकार्य करटी तालिम सञ्चालन करले बा ।
उक्त तालिमके अनुगमन पश्चात गाउँपालिका उपाध्यक्ष सत्गौंवा तालिममे सहभागिहुक्रनके सक्रिय तथा उत्ताहपूर्ण सहभागिता रहल बटैली । यकर साथे उहाँ तालिममे सक्कु सहभागीहुक्रे तालिम पश्चात सम्बन्धित तालिमसे सीकल सीप आपन व्यवहारमे लागु कैना समेत विश्वास व्यक्त करल रही । कलेसे उपाध्यक्ष सत्गौंवा गाउँपालिकासे यहाँके तमान संघसंस्थासे समन्वय सहकार्य कैटी अगामी दिनमे फेन तमान मेरके तालिम सञ्चालन कैना बटैली ।
स्मार्ट सोसाईटी नेपालके संरक्षक समिति संयोजक परशु चौधरी फेन स्मार्ट सोसाइटी नेपालसे डेगैल सक्कु तालिमके सहभागीहुक्रे अइना दिनमे सीकल सीप आआपन व्यवहारमे लागु कैना विश्वास व्यक्त करल रहिट । यकर साथे उहाँ गाउँपालिका भित्तर रहल वेरोजगार युवाहुक्रनहे गाउँपालिकाके सहयोग सहकार्यसे सीप मूलक विविध तालिमसे दक्ष बनैटी उहाँहुक्रनहे गाउँघरभित्रे स्वरोजगार बनैना लक्ष्य रहल बटैलै ।
ओस्टके कैलारी गाउँपालिकाके सुचना अधिकारी बलराम चौधरी संस्थासे सञ्चालन करल विविध तालिमसे गाउँघरके युवा स्वरोजगार बन्ना विश्वास व्यक्त करल रहिट ।
अनुगमनमे सहभागी अन्य प्रतिनिधीहुक्रे फेन संस्थासे आयोजित तथा गाउँपालिकाके आर्थिक सहयोगमे सञ्चालन हुइटी रहल विविध तालिम प्रभावकारी रहल बटैलै । उहाँहुक्रे तालिममे सहभागीहुक्रे सक्रिय ओ उत्साहिट होके तालिम लेटी रहल बटैलै ।
स्मार्ट सोसाइटी नेपालसे आयोजित तथा गाउँपालिकाके २५ लाखके आर्थिक सहगोगमे गाउँपालिका भित्तर बेटबाँसके सामाग्री निमार्ण, हेयर कटिङ्ग, कम्युटर तालिम, खाजा नास्ता, प्लाष्टिक टर्नेलमे तरकारी खेती, मोटर पंखा मर्मत, भवन पेन्टिङ्ग लगायतके तालिम सञ्चालन हुइटी रहल बा ।
तालिमके अनुगमन टोलीमे गाउँपालिकाके प्रशासकिय अधिकृत धर्मनन्द भट्ट, सुचना अधिकारी बलराम चौधरी, कैलारी गाउँपालिका वडा नं. ५ के वडा अध्यक्ष बिष्णु प्रसाद चौधरी, वडा नं. ३ के कैलाश कुश्मी, वडा नं. ७ के कमल प्रसाद चौधरी, वडा नं. ४ के भिखराम चौधरी, वडा नं. १ बालकृष्ण चौधरी, वडा नं. २ के सन्तुराम चौधरी, तमान वडाके वडा सदस्य, स्मार्ट सोसाइटी नेपालके सल्लाहकार उर्मिला चौधरी, अध्यक्ष अनुषा चौधरी लगायत, उपाध्यक्ष रामशरण चौधरी, सचिव रामुराम चौधरी, कोषाध्यक्ष निलम चौधरी, सदस्य बिष्णु चौधरी लगायत संस्थाके अन्य पदाधिकारी, पत्रकारहुक्रनके सहभागिता रहल रहे ।
