संस्कृति बचाईक परल कहिके भूमि व्यवस्थापन, कृषि तथा सहकारी मन्त्रीहे ज्ञापन

कैलाली १४ चैत । थारु समुदायके लोक कला, रिति संस्कृति, भेषभूषा लगायत थारु समुदायके समग्र अध्ययन अनुसन्धानके लाग थारु संग्राहलय अति आवश्यक रहल भूमि कृषि तथा सहकारी मन्त्री विनिता चौधरी बटैले बाटी ।

थारु समुदायके लोक कला, रिति संस्कृति भेषभुषा संरक्षण सम्बद्र्धनके लाग थारु कल्याणकारिणी सभा, थारु नागरिक समाज, सखी सञ्जाल, थारु महिला सभा, थारु विद्यार्थी समाज लगायत सामाजिक संघसंस्थासे पाँच सुत्रीय माग रख्टी बुझाइल ज्ञापन पत्र बुझ्टी मन्त्री चौधरी ओइसीन बटाइल हुइटी ।

दिन प्रतिदिन थारु लोक कला, रिति संस्कृति लोप हुइटी रहल अवस्थामे मन्त्री चौधरी अपने फेन सम्बेदनशील हुइल बटैली । कलेसे उहाँ ७ नम्बर प्रदेशमे एकठो थारु संग्राहलय निर्माण कैना सोच रहल सुनैली ।

कलेसे थारु संग्राहलय निर्माणसे यहाँके थारु समुदायके बारे अध्ययन अनुसन्धान कैना सजिल हुइनाके साथे लोप हुइटी रहल लोक कला, रिति संस्कृतिके संरक्षण सम्बद्र्धन फेन हुइना मन्त्री चौधरी विश्वास व्यक्त करल रही ।

यहोर मन्त्री चौधरी ज्ञापनपत्र बुझ्टी उक्त ज्ञापनपत्रमे उल्लेख रहल मागहे आवश्यक सम्बोधनके लाग अपने फेन आपन ओरसे सेक्नासम पहल कैना बटैली । उक्त पाँच सुत्रीय ज्ञापनपत्रमे थारुहुक्रनके ऐतिहासिक पर्व गुरही, चिरै भजहर, हरेरी, माघ, खोजनी बोजनी, अष्टिम्की, अट्वारीमे सार्वजनिक विदाके व्यवस्था करे पर्ना, थारु भाषाहे कामकाजी भाषाके रुपमे ग्यारेण्टी करे पर्ना, थरुहट थारुवान आन्दोलनसे उठान करल पहिचान ओ अधिकार सम्पन्न सिमांकनके बारेम न्यायसंगत बहसके बातावरणके सिर्जना करे पर्ना लगायत रहल बा ।

ओस्टके टीकापुर राजबन्दीहे बिनासर्त यथाशिघ्र रिहाके लाग मुद्धा फिर्ताके लाग पहल, थारु आयोगहे संवैधानिक आयोगके रुपमे वैधानिकताके आवश्यक पहल कैना माग रहल बा ।

ज्ञापनपत्र थाकसके केन्द्रिय महामन्त्री इन्दिरा चौधरी, थाकस पूर्व सभापति प्रभात कुमार चौधरी, सचिव माधव चौधरी, नेपाल आदिवासी जनजाति महासंघ कञ्चनपुर जिल्ला अध्यक्ष प्रेमवति राना लगायतके टोलीसे उक्त ज्ञापन पत्र बुझाइल ओस्तकेहे हरेक साल धनगढीमे मनैटी आइल चिरै भजहर यी साल फेन मनैना हुइल बा ।

मंगलके रोज धनगढीमे सखी सञ्जालके आयोजनामे हुइल छलफलसे यी बरस फेन चिरै भजहर मनाइना तयारी करल हो हो । चिरै भजहर अइना लौव बरस २०७५ बैशाख ८ गते शनिच्चरके रोज थारु छात्राबासमे मनाजिना सल्लाह हुइल सखी सञ्जालके उपाध्यक्ष उन्नती चौधरी जानकारी डेली । कलेसे उक्त कार्यक्रमके बर्का पहुनीके रुपमे भूमि व्यवस्थापन, कृषि तथा सहकारी मन्त्री विनिता चौधरी ओ खास पहुनीके रुपमे धनगढी उपमहानगरपालिकाके उपप्रमुख सुशिला मिश्र भट्ट रहना उपाध्यक्ष चौधरी जानकारी डेली ।

छलफल कार्यक्रममे थाकस कैलाली जिल्ला सचिव माधव चौधरी थारु समुदायके लोक कला, रिति संस्कृति बचैनाके साथे थारुहुक्रनके हक अधिकारके लाग राज्यहे दवाव डेना उद्देश्यसे चिरै भजहर यी साल फेन मनाइ लागल बटैलै ।

कार्यक्रममे अन्य सहभागिहुक्रे थारु कला, रिति संस्कृतिहे पुस्तान्तरण तथा अभिलेखीकरणके लाग थारु टरटिहुवार, चाडबार मनैना आवश्यक रहल बटैले रहिट । छलफल कार्यक्रममे थाकस केन्द्रिय सदस्य इन्दिरा चौधरी, थाकस कैलाली पूर्व सभापति प्रभात कुमार चौधरी, अधिवक्ताद्वय जोहारी लाल चौधरी, नाथुराम महतों, औषधी व्यवसायी गया प्रसाद कुश्मी, रोडन ग्रुपके चन्द्रसिंह चौधरी, खडक चौधरी लगायतके उपस्थिति रहल रहे ।

चिरैं भजहर नेपालके पश्चिमी तराई कैलालीमे बसोबास करुइया थारु समुदायके अविवाहित महिलाहुक्रे महिला स्वतन्त्रताके रुपमे मनैना करठै । बर्षौसे थारु दिदी बहिनीयाहुक्रे एक आपसमे खुशी साटासाट करटी यी पर्व मनैना करटी आइल बाटै ।

पौराणिक कालसे मनैटी आइल यी पर्वमे पहिले रोगब्याधी, जंङगलि जनावरसे बचक लाग तथा देवी देवताके पुजा आरधना कैके मनैना करजाए । मने कुछ समय यहोर थारु लोक कला संस्कृति हेरैटी गैलपाछे यहाँके युवाहुक्रे थारु समुदायके कला संस्कृतिके जगेर्ना करटी महिला स्वतन्त्रताके लाग यी पर्वहे मनैना करल बाटै ।

यी पर्वमे अविवाहित महिला ९छाइ० घरसे दुर रहल बगियामे जाके दिनभर पौराणिक खेल ९छुर, कोइली दिदी, कौरी नुकावर० खेल्ना ओ नाँचगान करटी रमाइलो कैके मनैना करठै ।