बेम्टी खेती ओर उदाहरणीय बन्लै जबदह्वाके महिला
कैलाली, ८ चैत्र । मिझ्नी खैना पैसा मिलठ् कलेसे सामान्यतः हमरे केह्का मिझ्नी खाई कना हुइठ् । मने कैलारी गाउँपालिका वडा नं. ५ (साविक पवेरा–४ जबदह्वा) के स्थानीय महिलाहुक्रे मिझ्नी ओ यातायातके पैसा बचाके बेम्टी (च्याउ) खेती कैके एक उदाहरणीय काम करले बाटै ।
सपना नागरिक सचेतना केन्द्रके महिलाहुक्रे आपन मिझ्नी ओ यातायातके पैसा बचाके बेम्टी खेती कैके एकओर उदाहरणीय काम करले बाटै नै दोसर ओर उहाँहुक्रे उत्पादन करल बेम्टी बेचके नगद आम्दानी फेन कैना सफल हुइल बाटै । गैलसाल मिझ्नीके पैसा बचाके सुरु करल बेम्टी खेती सचेतना केन्द्रके महिलाहुक्रे यी साल थप यातायातके पैसा लगानी करटी व्यवसायिक बेम्टी खेती ओर अग्रसर हुइना प्रयास करले बाटै ।
मने यी साल बेम्टी खेतीके लाग महिलाहुक्रे कैलारी गाउँपालिकासे सञ्चालित दुई दिने बेम्टी खेती तालिममे डेजैना यातायातके पैसा लगानी कैके बेम्टी खेतीहे निरन्तरता डेहल हुइट । सचेतना केन्द्रके २४ जने महिला सहभागि रहल तालिममे प्रति दिन १७५ के दरसे डेजैना यातायात भाडाहे बेम्टी खेतीमे लगानी करल केन्द्रके संयोजक पुष्पा चौधरी जानकारी डेली । संयोजक चौधरी गैल बरस बेम्टी खेतीमे कुछ सफलता पाइल पाछे यी साल फेन बेम्टी खेतीहे निरन्तरता डेहल बटैली ।
ओस्टके संयोजक चौधरी महिलाहुक्रनके सामूहिक रुपमे कुछ करी कना सोच लेके कम लगानी हुइलेसे फेन बेम्टी खेतीके सुरुवात करल सुनैली । उहाँ आघे कहली–‘हमार समूह गठन हुइटी किल कुछ करी कना सोच रहे । मने हमारठन लगानीके कुछ साधन श्रोत नाइ रहे ।’
‘हमारठन न लगानी न टे सिकल कौनो सीप’ संयोजक चौधरी कहली । समूहके एकदुइ जने उन्नत तरकारीबारे तालिम लेहल कहटी उहाँ बेम्टी खेती ओर हाथ डारल सुनैली । मने यी साल गाउँपालिकासे बेम्टी खेती सम्बन्धि दुई दिने तालिम डेहल पाछे कुछ सजिल हुइल संयोजक चौधरी कहली ।
केन्द्रके सचिव मीरा चौधरी गैल बरस बेम्टी उत्पादन हुइ लागल पाछे बजार नाइ मिली कि कहटी ढिउर चिन्तामे रही । मने अक्के दुक्के करटी बेम्टी खेतीबारे प्रचार प्रसार हुइलपाछे घरबैठे ग्राहक अइना सुनैली । सचिव चौधरी यी बरस ग्राहकहुक्रनहे बेम्टी नाइ पुगाई सेकके कबु छुच्छे हात घुमाई परल सुनैली ।
सचेतना केन्द्रके महिलाहुक्रे यी साल घर बैठ्ले डेढ क्वीन्टलसे ढिउर बेम्टी बेचके २६ हजारसे ढिउर नगद आम्दानी कैना सफल हुइल बाटै । कलेसे उहे पैसाहे समूहमे बार्षिक १२ प्रतिशतमे ऋण फेन लगानी कैना सफल हुइल संयोजक चौधरी बटैली । यी साल दुई क्वीन्टलसे ढिउर बेम्टी बेच्ना लक्ष्य रहल समेत संयोजक चौधरी जानकारी डेली ।
गैल साल ३५ पोकासे बेम्टी खेतीके सुरुवात करल उहाँहुक्रे यी साल १७५ पोका बनाके बेम्टी खेतीसे मजा आम्दानी कैना सफल हुइल बाटै । बिउबिजन यातायातके पैसासे किनल उहाँहुक्रे प्लाष्टि ओ स्प्रे ट्यांकी लगायत प्राविधिक सहयोग भर कृषि सम्पर्क केन्द्र हसुलियाके सहयोग रहल संयोजक चौधरी जानकारी डेली ।
कैलारी गाउँपालिकाके अध्यक्ष लाजुराम चौधरी सचेतना केन्द्रके महिलाहुक्रनसे करल बेम्टी खेती गाउँपालिकाके लाग उदाहरणीय रहल बटैलै । यहोर गाउँपालिकाके वडा नं. ८ हे बेम्टी खेतीके लाग पकेट क्षेत्र छुट्या सेकल ओरसे अध्यक्ष चौधरी बेम्टी खेतीके लाग अन्य वडाके महिला समूह अथवा कृषक समूह अनुदान पैनासे बञ्चित हुइना बटैलै । मने अध्यक्ष चौधरी गाउँपालिका भित्तर बेम्टी खेती करे चाहुइया महिला समूह अथवा कृषकहुक्रनके लाग उहाँहुक्रनके सीप तथा लगनशीलताके आधारमे गाउँपालिकासे कौना शिर्षक मार्फत बजेट विनियोजन कैना बटैलै । यकर साथे उहाँ बेम्टी खेतीके लाग कौनो संघसंस्थासे सीप तथा तालिम डेहुवाके उहाँहुक्रनहे लघुउद्यम मार्फत बेम्टी खेती ओर अग्रसर कैना बटैलै ।
स्थानीय शासन तथा सामुदायिक विकास कार्यक्रम अन्र्तगत विपन्न परिवारके सवाल ओ पहिचान लगायत समस्या बारे कैलारी गाउँपालिका वडा नं. ५ (साविक पवेरा गाविस वडा नं. ४ जबदह्वा) गाउँमे २०७२ चैतमे सपना नागिरक सचेतना केन्द्र गठन हुइल रहे ।
सचेतना केन्द्रमे गाउँके अति विपन्न परिवारके २४ जने महिलाहुक्रनके सहभागिता रहल बाटै । केन्द्रके मासिक चार दिन बैठक बैठजाए कलेसे बार्षिक ५२ अठ्वार बैठक बैठे परना रहे । जौन बैठकमे महिलाहुक्रनके लाग प्रति महिला १२ रुप्या नास्ताके लाग पैसा छुत्याइल रहे । उहे नास्ताके पैसासे सचेतना केन्द्रके महिलाहुक्रे गैल बरससे बेम्टी खेतीके सुरुवात करल रहिट ।
ओस्टके बड्कीपलियाके गाउँमे फेन गठन हुइल चम्पा चमेली नागरिक सचेतना केन्द्रके महिलाहुक्रे आर्यआर्जन कार्यक्रम अन्र्तगत बंगुर पालन, सिलाई कटाई, बचत लगायत तमान काम करटी आइल बाटै ।
