एसइई परीक्षा सुरु
कैलाली, ८ चैत । आजसे देशभर एसइई परीक्षा सुरु हुइना हुइल बा । प्रदेश नं. ७ के सक्कु जिल्लामे परीक्षाके सक्कु तयारी पूरा हुइलओरसे निर्धारित समय विहान ८ बजेसे परीक्षा हुइना हुइल बा ।
सुदूरपश्चिम क्षेत्रीय शिक्षा निर्देशनालय डोटीके अनुसार यहाँके सक्कु जिल्लामे जनशक्ति परिचालन, प्रश्नपत्र पुगैना, केन्द्र निर्धारण लगायत सक्कु तयारी पूरा हुइल जनागिल हो ।
क्षेत्रीय निर्देशक मानसिंह बिष्ट परीक्षाहे मर्यादित ओ शान्तिपूर्ण ढंगसे सञ्चालन करेक लाग सक्कु तयारी पूरा करल जानकारी डेलै । उहाँके अनुसार प्रदेश नं. ७ मे नियमित, प्राविधिक ओ आंशिक करके जम्मा ५४ हजार ९२८ जाने विद्यार्थी परीक्षामे सहभागी हुइना हुइल बाटै । नियमित ओहोर ५० हजार २२१, प्राविधिक ओहोर ९२१ ओ आंशिक ओहोर ३ हजार ७८६ जाने विद्यार्थी सहभागी हुइना हुइल हुइट ।
ओस्टके सबसे धिढउर विद्यार्थी कैलाली जिल्लासे १६ हजार ९६२ जाने ओ सबसे कम डडेल्धुरा जिल्लासे २ हजार ७२४ जाने विद्यार्थी सहभागी जनैना हुइल बाटै ।
परीक्षाके सक्कु तयारी पूरा हुइलेसे फेन अनुगमनमे कुछ समस्या हुइ सेक्ना क्षेत्रीय निर्देशक बिष्ट बटैलै । निर्देशनालयमे रहल गाडी आन्तरिक मामिला तथा कानून मन्त्रालय आपन प्रयोगके लाग झिकाइलपाछे अनुमगनमे अप्ठेरो सिर्जना हुइना बटैलै ।
पहिले एसएलसी परीक्षाके रुपमे चिन्जैना यी परिक्षाहे ग्रेडिङ प्रणालीमे लैगिलपाछे तीन वर्ष याहोर एसइई परीक्षाके रुपमे कहिगिल बा । जौन परीक्षाहे शैक्षिक क्षेत्रमे फलामे ढोकामे रुपमे फेन लेजाइठ ।
