पेट्रोल छिरिकके खोकामे आगजनि, डाई ओ छावाके आधा शरीर जरल

धनगढी, ३० फागुन । कैलालीके लम्की चुहा नगरपालिका–४ बलियाके स्थानीय मानबहादुर चौधरीके खोका पसलमे आगजनि हुइलपाछे आगीसे शरीरके अधिकांश भाग जरल उहाँक् गोसिनिया ओ छावाक् उपचार हुइटी रहल बा ।

खोकामे उहाँके गोसिनिया सन्तोली चौधरी ओ छावा नेत्रविक्रम चौधरी सुटल बेला गैल शुकके रात ११ बजे अज्ञात समूहसे पेट्रोल छिरिकके आजजनि हुइल रहे । आगजनिपाछे उहाँक छावाक् दुनु गोरा जरल बा ।

कलेसे उहाँक् गोसिनियाक् चेहरा, छाती, एक हात ओ दुनु गोर जरल बा । हाल उहाँहुकन उपचार भेरी अञ्चल अस्पताल बाँकेमे हुइटी रहल पीडित मानबहादुर चौधरी जनैलै । उहाँके अनुसार उहाँ घारीमे सुटल रहिट ।

कलेसे उहाँके गोसिनिया ओ छावा खोकामे सुटल रहिट । ‘अभिन हम्रे जागल रहि, मोटरसाइकलमे आइल मनैया पेट्रोल छिरिकके सलाई मार डेहल, आपन परिवारहुकन बचाउ कि आगी लगुइयाहे पक्ररु हुइल, परिवारहुकन बचाइट बचाइट उ भागगिल’, उहाँ दुःख व्यक्त कर्लै । दुई महिना आघे उहाँके खोकामे चोरी हुइल रहे ।

ओहेकमारे खोकामे सुट्टी आइल उहाँके कहाई बा । आपन किहुुसे दुश्मनी नैरहल बटैटी उहाँ ढिउर क्षतिके सामना करे परल बटैलै । मजासे किहुहे परिचान करे नैसेकलओरसे हालसम केक्रो उप्पर उजुरी नैकरल बटैटी उहाँ गाउँहिक मनैन्से घटना घटल फेन आशंका व्यक्त कर्ले बाटै ।