हुलाकी सडक निर्माणके कार्य गति लेहलपाछे स्थानीय खुशी
धनगढी, १४ फागुन । कैलालीमे हुलाकी सडक निर्माणके कार्य गति लेहलपाछे स्थानीयहुक्रे खुशी हुइल बाटै ।
कुछ भागमे तमान समस्याके कारण निर्माण कार्य रुकल हुलाकी सडक निर्माणके कार्य फेरसे गति लेहलपाछे स्थानीय खुशी हुइल हुइट । धनगढीके क्याम्पसरोडसे सत्तीसम ओ लम्कीसे खक्रौलासम दुई खण्डमे निर्माण करल हुलाकी सडक खण्डके धनगढी–सत्ती सडक खण्डमे १८ किलोमिटर वनुवा परल ओरसे ओम्ने ढिलाई हुइल रहे ।
मने चालु आर्थिक बरसमे १८ किलोमिटर मध्ये १६ किलोमिटरमे रुखुवा कटानके काम सुरु करलसंगे निर्माणके काम गति लेहल हो । अब्बे उक्त हुलाकी सडक खण्ड अन्र्तगत माटी पटानीके काम धमाधम हुइटी रहल बा । गैल बरस फागुनमे ३० महिनाके निर्माण अवधि सहित तुन्डी परेरा चन्द्रा एण्ड वसन्ता जेभी निर्माणके ठेक्का लेहलपाछे अब्बे निर्माणके काम धमाधम हुइटी रहल बा ।
हुलाकी सडक निर्माणके कार्य गति लेहलपाछे कैलारी गाउँपालिका–७ भुँइयाँफाँटाके स्थानीय पृथीपाल चौधरी खुशी व्यक्त करलै । स्थानीय चौधरी सडक सञ्जाल विस्तार हुइना हुइलपाछे गाउँघरके विकास हुईना आशा व्यक्त करलै ।
ओस्टके स्थानीय राजकुमार चौधरी फेन हुलाकी सडक निर्माण पाछे गाउँघरमे उत्पादित कृषिउपज शहरबजारमे ढुवानी कैना सहज हुइना बटैलै । साथे बर्षाैसे भोग्टी आइल यातायातके समस्या दुर हुइना बटैलै ।
हुलाकी सडक निर्माणके काम सम्पन्न हुइनासे पहिले पोरसाल माघ ६ गते तत्कालिन भौतिक योजना तथा निर्माणमन्त्री रमेश लेखक ओ भारतीय राजदुत रन्जित राय निर्माण सम्पन्न नाइ हुइटी सडकके उद्घघाटन करल रहिट ।
यहोरे क्याम्पस रोडसम निर्माण कार्य ओराइल हुलाकी सडकहे धनगढीमे भर कौन क्षेत्रसे लैजाके कञ्चनपुरमे जोड्न कना विवाद कायमे रहल बेला वडा नं २ ओ ८ हुइटी क्याम्पस चोकसम सर्भे फेन होसेकल बा ।
मुख्य बजार क्षेत्रमे घना बस्तीके कारण राजमार्ग निर्माण करेबर घरलगायत ढिउर संरचना भत्काइ परना ओस्टके लागत बह्रना हुइल ओरसे दक्षिणी भाग वडा नं २ ओ ८ हुइटी क्याम्पस चोक जोड्न मेरके हुलाकी राजमार्गके रेखांकन करल हो । कैलालीमे अवरुद्ध कामसे गति लेनाके साथे कञ्चनपुरके डोकेवजार वेलौरी वेल्डाडी दैजी सडक खण्डमे फेन धमाधम निर्माणके काम हुइटी रहल बा ।
दुनु जिल्लामे निर्माणके काम करक लाग चालु आर्थिक बरसमे हुलाकी राजमार्ग आयोजनाहे झण्डे १७ करोड ७२ लाखसे ढिउर बजेट स्वीकृत होके आइल बा । यी बजेटसे छ ठो पुल निर्माण कैनाके साथे सडक फेन निर्माण करजैना बा । समस्यामे अल्झटी आइल हुलाकी राजमार्ग आयोजनाके काम आघे बह्रलपाछे यी क्षेत्रके बासिन्दा खुशी हुइल बाट ।
