माघ खोजनी बोझनी मेला २०७४ सुरु

कैलाली, १७ माघ । धनगढी उपमहानगरपालिका–५ तारानगरके डेउठानमे मंगरसे ‘माघ खोजनी बोझनी मेला २०७४’सुरु हुइल बा ।

‘थारु भाषा कला संस्कृति गीतबास हमार पहिचान, अधिकार सुनिश्चत व समृद्ध समाज निर्माण करना हमार साझा अभियान’ कना मूल नाराके साथ तारानगर, हसनपुर, जाई ओ मटियारी गाउँके संयूक्त आयोजनामे पाँच दिने कार्यक्रम हुइ लागल हो ।

कैलाली क्षेत्र नम्बर पाँच से निर्वाचित प्रदेशसभा सांसद डिल्लीराज पन्तके वर्का पहुनामे कार्यक्रममे उहाँ थारु कला, संस्कृति जर्गेनाके अपने पाछे नइपर्ना बटैलै । थारु समुदाय कला, संस्कृतिके धनी समुदाय रहल ओरसे यिहीहे भावी पुस्ताके लाग जोगाके रख्ना आग्रह करलै ।

कार्यक्रममे वडा नम्बर पाँचके वडाअध्यक्ष हिरासिंह पातली, थारु अगुवा खडक चौधरी, माधव चौधरी मन्तव्य व्यक्त करले रहिट ।
तारानगर गाउँक भल्मन्सा कृष्णा चौधरीके अध्यक्षतामे हुइल उदघाटन हुइल कार्यक्रमके संचालन द्वाय विनिता चौधरी ओ मानबहादुर चौधरी‘अन्जान’ करले रहिट । उदघाटन कार्यक्रममे राष्ट्रिय थारु गायक÷गायिका मनिराम चौधरी ओ अन्नु चौधरी भरपुर मनोरन्जन डेहल रहिट कलेसे थारु समुदायके झुम्रा, मघौटा, सखिया नाँच, एकल नाँच, सामुहिक नाँच प्रस्तुत हुइल आर्थिक संयोजक ललित चौधरी बटैलै ।

माघ महिनाहे थारु समुदाय लौव बरषके रुपमे लेहल ओरसे महिनाभर हुइना गतिविधिबारे जानकारी डेनाके संगे भाषा, कला, संस्कृतिके संरक्षण सम्बद्र्धनके लाग पाँच दिने खोजनी बोझनी मेला २०७४ हुइटी रहल आर्थिक संयोजक चौधरी बटैलै ।

माघ २० सम चल्ना उ मेलाके बुधके रोज थारु राष्ट्रिय गायक÷गायिका तुफान राजवंशी, खेम चौधरी ओ रितु चौधरीके वेजोड प्रस्तुतीके साथे स्थानीय कलाकारहुकनके प्रस्तुती, स्थानीय झाँकी सखिया नाच, मुग्रहवा नाँच, मघौता नाँच, होरी नाँच प्रस्तुत हुइना आयोजक जनैले बा । मेलामे स्टल धारल थारु परिकारके व्यवस्थाफे करल बा । ‘खोजनी बोझनी मेला आघेक बर्षफे आयोजना कैगिल रहे ।