चुरे क्षेत्रके पर्यटन प्रर्वद्धनके लाग मोहन्यालके सोल्टामे त्रिवेणी महोत्सव

धनगढी, १५ माघ । कैलालीके मोहन्याल गाउँपालिका–६, सोल्टामे त्रिवेणी महोत्सव २०७४ आयोजना हुइना हुइल बा ।

‘स्वच्छ, ताजा मच्छी, जलमार्गके, सेती, कर्णाली ओ भेरीके त्रिवेणी चिन्हैना हमार’ कना मुल नारा सहित महोत्सव आयोजना हुइ लागल हो ।

चुरे वातावरण तथा जैविक विविधता संरक्षण मञ्च नेपालके दुसरा संस्करण अन्र्तगत महोत्सव यिहे अइना फागुन १३ गतेसे १९ गतेसम आयोजना हुइना हुइल हो । मञ्चसे सोम्मारके रोज धनगढीमे पत्रकार सम्मेलन मार्फत महोत्सव आयोजना बारे जानकारी करागिल हो । चुरे वातावरण तथा जैविक विविधता संरक्षण मञ्चके अध्यक्ष तथा महोत्सव मूल आयोजक समिति संयोजक विरेन्द्र बहादुर रावल महोत्सव आयोजना कैना बारे जानकारी कराइल रहिट ।

पत्रकार सम्मेलनमे महोत्सव मूल आयोजक समिति संयोजक रावल चुरे क्षेत्रके कृषि, पर्यटन, आर्थिक, धार्मिक, सांस्कृतिक एवं सामाजिक विकासके लाग यी बरस दुसरा संस्करण अन्र्तगत महोत्सव आयोजना कैना तयारी हुइटी रहल जनाइल रहिट ।

महोत्सवके मूल उद्देश्यमे स्थानीय एंव राष्ट्रिय स्तरमे उत्पादित दैनिक उपभोग्य एंव औद्योगिक बस्तुके विकास ओ पर्वद्र्धनमे सहयोग, कृषि क्षेत्र ओ जडिबुटी पेशाहे व्यवसायिक रुपमे उन्मुख करैना सहयोग, सुदूर पश्चिमके कला, लोक संस्कृति ओ साहित्यके जर्गेना एवं प्रवद्र्धनमे सहयोग, शिक्षा, स्वास्थ्य तथा विकास निर्माणके क्षेत्रमे हुइल गतिविधी बारे जानकारी, सूचना प्रविधि बारे जानकारी लगायतके रहल बा ।

ओस्टके सुदूरपश्चिमके मुख्य प्रवेशद्वारके रुपमे रहल कर्णाली चिसापानी ओ त्रिवेणीहे पर्यटन गनतव्य स्थलके रुपमे स्थापित कैना, जलमार्गके सम्भावनाहे अध्ययन कैना, कर्णालीके मच्छीहे अन्य बजारसम पुगैना ओ व्यपार व्यवसायमे थप जागरण लन्ना, धार्मिक पर्यटनहे व्यापक प्रचारप्रसार कैना ओ यातायातके सेवा विस्तारके लाग पहल कैना रहल बा ।

महोत्सवहे दुई लाग अवलोकन कर्ताहुक्रनसे अवलोकन कैना लक्ष्य लेहल बा । कलेस महोत्सव हेरक लाग स्थानीय, छिमेकी जिल्ला बर्दिया, सुर्खेत, डोटीके दक्षिणी भेग, अछाम ओ दैलेख लगायत सुदूरपश्चिमके तमान जिल्ला लगायत देशके तमान जिल्लासे अवलोकनकर्ता करे अइना लक्ष्य लेहल संयोजक रावल जानकारी डेलै ।

महोत्सवके आकर्षणमे राष्ट्रिय तथा स्थानीय कलाकारहुक्रनके वेजोड सांस्कृतिक प्रस्तुती, सांस्कृतिक झाँकी प्रर्दशनी, आदिवासी जनजाती समुदायके रहनसहन ओ भेषभूषा प्रर्दशनी लगायत रहना संयोजक रावल जानकारी कराइल रहिट ।

ओस्टके महोत्सवमे विक्री हुइल प्रति टिकट दुई रुप्याके दरसे उठल रकम मोहन्याल ७ कुईनेके विरेन्द्र बहादुर माझीके ५ बर्षिय छावा क्यान्सर पिडित आरएन माझीहे उपचार सहयोग ओ धार्मिक पर्यटन क्षेत्र त्रिवेणीमे प्रतिक्षालयके निर्माण कैना संयोजक रावल जानकारी डेलै ।

गैल बरस मञ्चसे सुगरखाल महोत्सव २०७३ हे एम्बुलेन्स सेवा सञ्चालनके माग सहित सफलतापूर्वक सम्पन्न करसेकल समेत संयोजक रावल जानकारी डेलै