थारु समुदायमे माघी डेवानी सुरु, धमाधम नेतृत्व चयन
कैलाली, ५ माघ । तीन दिनसम धुमधामसे माघी मनाइलपाछे थारु समुदायमे माघी डेवानी सुरु हुइल बा ।
बरस भरिक कामके समिक्षा कर्ना, भल्मन्सा, बरघर, अघारी, चिराकी, गुरुवा, केसौकालगायत गाउँक् नेतृत्व चयन कर्ना या अनुमोदन कर्ना काम तथा माघी डेवानी सुरु हुइल हो ।
पहिले–पहिले गाउँक् भेलासे सर्वसहमतिमे गाउँक् नेतृत्व चयन कर्ना या पुराने नेतृत्वहे अनुमोदन करजाए । मने पछिल्का समय कतिपय थारु वस्तीमे नेतृत्वके लाग ढिउर आकांक्षा डेखा परलपाछे चुनावी प्रणालीसे फेन नेतृत्व चयन करल पाजाइठ ।
यहेबीच बुधके रोज कैलारी गाउँपालिका–३ लालपुरके स्थानीयहुक्रे गाउँक् नेतृत्व फेरसे पुराने अनुमोदन कर्ले बाटै । गाउँक् हुइल भुरा खेल कार्यक्रमसे स्थानीयहुक्रे गाउँ, समाजके लाग इमान्दारिताके साथ काम करटी आइल कहटी पुराने नेतृत्व अर्थात भल्मन्सा ओ अघारिया चयन कर्ले बाटै । उहाँहुक्रे पुराने भल्मन्सा जगदिश चौधरीहे फेरसे भल्मन्सामे चयन कर्ले बाटै । जगदिश चौधरीके १० औं बरसके कार्यकाल सुरु हुइल बा । उहाँ नौ बरससम लगातार सफलतापूर्व भल्मन्साकेक कार्यभार पूरा करल स्थानीय धनबेलिया सामुदायिक वन उपभोक्ता समूहके सचिव मनिप्रसाद चौधरी जानकारी डेलै ।
ओस्टके गाउँक् पुराने अघारी बिन्तीराम चौधरी फेरसे अघारीमे चयनमे हुइल बाटै । उहाँ चार बरसके कार्यकालमे प्रवेश कर्ले बाटै । लालपुरमे ४८ घरधुरी रहल बा ।
ओस्टके बुधके रोज गोदावरी नगरपालिका–८ फकलपुरमे फेन माघी डेवानी कार्यक्रम हुइल बा । माघी डेवानी कार्यक्रमसे फकलपुरके लौव भल्मन्सामे यम बहादुर चौधरी चयन हुइल बाटै । ओस्टके चिराकीमे हरिपदम चौधरी, भल्मन्सा सहयोगी सदस्यमे खुशीराम चौधरी, फूलाराम चौधरी, राजकुमारी चौधरी सर्बसम्मत चयन हुइल बाटै ।
थारु वस्तीमे माघी डेवानी कार्यक्रम माघ महिनाभर जारी रहना थारु अगुवाहुक्रे बटैठै ।
