भादा होमस्टे ३५ हजार पर्यटकसे अवलोकन
धनगढी,१५ पुस । धनगढी उपमहानगरपालिका–१६ मे रहल थारु होमस्टे भादा गाउँके ३५ हजार आन्तरिक तथा बाहिय पर्यटक अवलोकन
करले बाटै ।
२०६७ पुस १७ से सुरु हुइल होमस्टेके सात बर्षमे तीन सय बाहिय पर्यटक सहित ३५ हजार आन्तरिक पर्यटक होमस्टे अवलोकन करल थारु होमस्टे गाउँ पर्यटन विकास तथा व्यवस्थापन समितिके अध्यक्ष लक्ष्मीनारायण चौधरी बटैलै ।
थारु समुदायके सिप, कला संस्कृति, भाषा खानपान, सम्पदा ओ प्राकृतिक स्रोतके सदुपयोग करके आर्थिक तथा सामाजिक स्तरमे अभिबृद्धि करटी थारु जातीके पहिचानहे पर्यटन व्यवसाय मार्फत राष्ट्रिय तथा अन्तर्राष्ट्रिय स्तरमे पुगाइक लाग होमस्टे संचालनमे नानल उहाँ बटैलै ।
होमस्टे अवलोकनके लाग वार्षिक करिब ५ हजार आन्तरिक पर्यटक संग्गे संघ संस्थामार्फत आइल बाहिय पर्यटकफे अवलोकन करे पुगल अध्यक्ष बटैठै । बाहिय देश जर्मन, अमेरिका, जापान, थाइलेण्ड, नर्बे ओ क्रिगिक्रिस्तानके पर्यटक भादा आइल अध्यक्ष जनैलै ।
थारु होमस्टे भादा गाउँ धनगढी बजारसे १७ किलोमिटर केल बा, कलोपत्रे डगरा नइहुके पर्यटकहुकन जैना समस्या हुइटी रहल उहाँ कहलै । बेलीसे भादासम सडक कालोपत्रे करेक लाग एशियान आरटीपी प्रोजेक्ट ठेक्का लेलेसेफे प्रक्रिया अभिनसम आघे नइबह्राइल अध्यक्ष चौधरी जनैलै । उहाँ थारु होमस्टे गाउँ भादामे बाह्रय पर्यटक भित्रैना ढेर चुनौती रहल बटैटी गेटा विमान स्थलहे अन्तर्राष्ट्रिय विमान स्थल ओ गौरीफन्टा नाकाहे अन्तर्राष्ट्रिय नाकाके रुपमे विकास कैना अति आवश्यक रहल बटैलै ।
होमस्टे पुगल पर्यटकहुकनहे चाहल अनुसार थारु परिकार, बासके व्यवस्था, मनोरन्जनके लाग थारु समुदायके नाँच डेखैना, थारु होमस्टे घुमाइक लाग लहरुके व्यवस्था ओ पर्यटकीय जोगिनिया टलुवामे शयर करेक लाग लाउके व्यवस्था करल समितिके कोषाध्यक्ष पदम चौधरी बटैलै । सन २०११ जनवरीमे १७ घरसे सुरुवाट करल होमस्टे अब्बे १९ घरमे संचालन रहल बा ।
