ग्रामीण भेगमे लक्ष्मण थारु जेलमुक्त करो अभियान
धनगढी, १५ अगहन । कैलालीके निर्वाचन क्षेत्र नम्बर ५ के ग्रामीण भेगमे लक्ष्मण थारुहे जेलमुक्त कराई अभियान सुरु हुइल बा ।
चुनावी सरगर्मी बह्रल संगे अन्य राजनीतिक दलके नेता तथा कार्यकर्ता ग्रामीण भेगके टोल–टोलमे पुग्लेसे फेन स्थानीयहुक्रे स्वस्फुर्ट अभियान चलाइ लागल बाटै । क्षेत्र नम्बर ५ से प्रतिनिधि सभा सदस्य उम्मेदवार रहल उम्मेदवार थारु राष्ट्रिय जनता पार्टीसे उम्मेदवारी डेले बाटै । मने ग्रामीण भेगके स्थानीयहुक्रे उम्मेदवार थारुहे राजपाके उम्मेदवारसे फेन केवल जेलसे मुक्त कराइक लाग एक भोग डेके सहयोग करेक पर्ना अभियान चलाइल हुइट ।
कैलारी गाउँपालिका–६ के स्थानीय यूवा अरविन चौधरी अप्ने कौनो दलके कार्यकर्ता नैरहलेसे फेन टीकापुर घटनामे संलग्न नैरहल व्यक्तिहुकन दुई बरससम पुर्पूक्षके लाग अभिनसम थुनामे राखके राज्यसे अन्याय करलओरसे एक भोट लक्ष्मणहे डेके जेलमुक्त करेक पर्ना जरुरी रहल ओरसे अभियान चलैटी रहल बटैलै ।
सक्कु राजनीतिक दल टीकापुर घटना ओ राजबन्दी परिवारहुकनहे भ¥याङ बनाके राजनीतिक स्वार्थ पूर्ति करटी रहल बटैटी उहाँ आब वास्तविक थारुलगायत उत्पीडित समुदायके हक अधिकारवारेमे आवाज उठैना ओ विकास प्रेमी नेताहे जिटाइक पर्ना फेन उहाँके कहाई रहे ।
ओस्टके ओहे गापाके वडा नम्बर ६ के रामराशी चौधरी बहुट राजनीतिक दल आपन मजा–मजा चुनावी एजेण्डा सुनैना, मिझ्नी खैना पैसा बट्टी अइलेसे फेन अप्नेहुक्रे यि पाली झुठ्ठा मुद्धामे जेल जीवन बिटैटी आइल थारुहुकनके लाग एक भोट डेना बटैली ।
स्वफुर्ट अभियानमे जुटल स्थानीयहुक्रे चुनावी झण्डा नैटाँङके आ–आपन घरमे रहल छाता आ–आपन घरमे टाँगे लागल बाटै । ओस्टके धनगढी उपमहानगरपालिका–१५ उर्माके स्थानीय रामचन्द्र राना फेन गाउँघरमे स्फुर्ट रुपमे चुनाव चिन्ह छातामे भोट डारके लक्ष्मण थारुलगायत जेलबन्दीहुकन रिहाई पर्ना कहिकके अभियान चलैटी रहल जानकारी डेलै ।
उम्मेदवार थारु आपन पक्षमे डेढ सय गाउँमे जेलमुक्त करो अभियान स्वफुर्ट रुपमे जारी रहल बटैलै । उहाँ ग्रामीण भेगसे सहरी क्षेत्रमे अभियान केन्द्रीत हुइल फेन दाबी कर्लै । आमजनता सचेत रहल बटैटी उहाँ आपन जीत सुनिश्चित रहल दाबी कर्लै । नेता थारु जेलसे चुनाव जिटके इतिहास कायम कर्ना फेन बटैलै ।
यहेबीच नेकपा माओवादी ओ नेकपा एमालेके वामगठबन्धन ओ नेपाली काँग्रेसके नेता कार्यकर्ताहुक्रे फेन चुनावी अभियानहे तीव्र बनैले बाटै । सक्कु उम्मेदवार आ–आपन चुनावी एजेण्डा सहित घरदैलो कार्यक्रमहे तीव्र बनैले बाटै । आ–आपन जीत सुनिश्चित रहल फेन उहाँहुकनके दाबी बा ।
क्षेत्रीय निर्वाचन कार्यालय धनगढीका अनुसार निर्वाचन क्षेत्र नम्बर ५ मे ९१ हजार ८१८ जाने मतदाता रहल बाटै । जहाँ करिब ३० हजार समुदाय समुदायके मतदाता रहल बाटै । कैलारी गाउँपालिकाके ६ ओ ९ नम्बर वडा ओ धनगढी उपमहानगरपालिकाके सक्कु वडा मिलाके निर्वाचन क्षेत्र बनागिल बा ।
