सांस्कृतिक कार्यक्रमसहित गौरीशंकरके चुनावी घरदैलो
हसुलिया, १५ अगहन । वामगठबन्धनके साझा उम्मेदवार तथा पूर्व कृषि मन्त्री गौरीशंकर चौधरीके चुनावी घरदैलो कार्यक्रम विफेक् रोज साँस्कृतिक कार्यक्रमसहित हुइल बा ।
आपन टमान एजेण्डासहित चुनावी मैदानमे रहल चौधरीके साविक पवेरा गाविसके टमान वडामे साँस्कृतिक कार्यक्रमसहित घरदैलो कार्यक्रम हुइल हो । उ साविक पवेरा गाविसके पलिया, गोबरैला, पवेरा, उदासीपुरलगायत ठाउँमे घरदैलो कार्यक्रम हुइल जनागिल बा ।
चुनावी घरदैलो तथा कार्यक्रमहे सम्बोधन करटी पूर्व कृषि मन्त्री चौधरी अप्ने जिट्लेसे सुपर जोन कार्यक्रम थप कुछ क्षेत्रमे विस्तार करके डेखैना बटैलै । उहाँ किसानहुकनके लाग बरदान सावित हुइल उ कार्यक्रम पवेरा, हसुलिया, रतनपुरमे फेन विस्तार कैनामे अप्ने प्रतिवद्ध रहल दाबी कर्लै । साथे आधुनिक कृषि यन्त्र उपकरणके सहज बिक्रि वितरणके लाग पहल कैना प्रतिवद्धता जनैलै । सिचाईके लाग गुरगी बाँध, मोहना लडियामे तटबन्धके व्यवस्था, हसुलियामे बहुमुखी क्याम्पस बनैनाके साथे शिक्षा, स्वास्थ्य, रोजगारीके ग्यारेन्टी कर्ना उहाँके कहाई बा ।
अप्ने मन्त्री बनल छोट अवधीमे ढिउर काम करके डेखाइल बटैटी उहाँ जिट्ले करल वाचा पुरा करके डेखैना फेन बटैलै । मने कुछ उम्मेदवार करिब २६ बरससम सांसद, मन्त्री बन्लेसे फेन कुछ नैकरल ओरसे मतदाताहुक्रे विकासप्रेमी उम्मेदवारहे समयमे पहिचान करेक पर्नामे जोड डेलै । यहेबीच उहाँ अप्ने जिट्लेसे किसान पेन्सन, बाली विमा, पशु विना कार्यक्रम फेन लागु कर्ना बटैलै ।
ओस्तहक संघीय समाजवादी फोरम नेपालसे कैलाली क्षेत्र नम्बर ३ से प्रतिनिधि सभा सदस्यके लाग उम्मेदवारी डेहल थारु नेता भानुराम थारु आपन चुनावी प्रचारप्रसारहे तीव्र बनैले बाटै ।
विफेक् रोज हसुलिया, पवेरामे घरदैलो कार्यक्रम करल उहाँ थारु समुदायके हक अधिकारके लाग अप्ने निरन्तर लड्टी आइलओरसे आपनहे जिटाइक पर्ना बटैलै ।
कुछ राजनीतिक दलहुक्रे गठबन्धनके शक्ति डेखैलेसे फेन उ राजनीतिक दलहे आमजनताहुक्रे मजासे चिन्सेकल उहाँके कहाई बा । आपन पक्षमे चुनावी माहोल बन्टी गैल बटैटी नेता थारु उत्पीडित समुदायके हक अधिकार ओ विकास ओ शान्तिके लाग आपनहे जिटाइक पर्ना आहृवान कर्लै ।
