चुनाबमे बालबालिकानहे प्रयोग नैकर्ना प्रतिबद्धता

धनगढी,१३ अगहन । विद्यालयहे शान्ति क्षेत्र ओ बालबालिकाहे चुनावमे प्रयोग करे नाइपैना कहटी राजनितिक दल, नागरिक समाज प्रतिबद्धता जनैले बाटै ।

बुधके रोज धनगढीमे राष्ट्रिय मानव अधिकार आयोग, सिविन नेपालसे आयोजित प्रादेशिक तहमे बालबालिका तथा विद्यालय शान्तिक्षेत्र अवधारण कार्यान्वयनके लाग प्रतिबद्धता कार्यक्रममे संयूक्त रुपमे हस्ताक्षर करके प्रतिबद्धता जनैले रहिट । बालबालिका तथा विद्यालय शान्तिक्षेत्र हुइट कना सिद्धान्तहे आत्मसात करके यकर पूर्णपालना कैना, शिक्षा क्षेत्रहे आत्यावश्यक सेवा धारके कौनोफे बन्द हडतालके बेलाफे पठनपाठनमे अवरोध पुगैना काम नाइकैना, विद्यालयमे सशस्त्र÷हिंसात्मक गतिविधि ओ राजनितिक हस्तक्षेत्र नाइकैना, यैसिन गतिविधिहे निरुत्साहित कैना प्रतिबद्धतापत्रमे उल्लेख बा ।

ओस्टेक विद्यालय हाताहे कौनोफे मेरिक भेदभाव, दण्डसजाय, दुव्र्यवहार, वेवास्ता ओ शोषणसे मुक्त कैना, सार्वजनिक स्थान घर तथा विद्यालय सवारी साधन, वाल उद्यानहे बालमैत्री बनैना, आसन्न प्रतिनिधि सभा तथा प्रदेशसभा निर्वाचनके सन्दर्भमे बालबालिकाहे राजनैनिक दल वा उम्मेदवारके जुलुश, ¥याली प्रचार प्रसारमे सहभागी नइकरैना, पर्चा पम्पलेट टाँसे, पाल टाँगे, खाना बनाइ लगैना, खैना, खवैना कार्यमे नाइलगैना प्रतिबद्धता जनैले बाटै ।

महिला तथा बालबालिका कार्यालय धनगढीके प्रमुख सन्ध्या राजेश्वरी सिंह स्थानीय चुनावके बेला बालबालिकाके प्रयोग व्यापक हुइल बटैली ।
स्थानीय चुनावके बेला राजनितिक दल बालबालिकाके प्रयोग करके पर्चा बाँटे लगैना, पोस्टर टाँसे लगैना, झण्डा टँग्ना ओ खास करके उम्मेदवारी दर्ताके दिन ओइनहे ¥याली प्रचारप्रसारमे प्रयोग करल भेटाइल उहाँ कहली ।

जिल्ला शिक्षा अधिकारी गणेश बहादुर सिंह राजनितिक दलहुक्रे अपन आमसभा, ¥याली प्रचारप्रसारमे महिला, मजदुरहे बोक्के नानल कारण घरे रहल बालबालिकाहे असर पर्ना बटैलै ।

वार एशोसियशनके अध्यक्ष प्रेम चन्द चुनावके बेला ३–४ विद्यालय बन्द करल करण विद्यार्थीहुक्रे पह्रे पैना अधिकारसे बन्चित हुइल बटैलै । कार्यक्रममे निर्वाचन परिवेक्षण (नियोक) के जिल्ला संयोजक देवीलाल खनाल, नेपाल पत्रकार महासंघ कैलालीके सभापति जगत साउद, गैर सरकारी संस्था महासंघके अध्यक्ष हेमकर्ण विक, नेपाल रेडक्रस सोसाइटी कैलालीके अध्यक्ष उत्तम जोशी विद्यालयहे शान्ति क्षेत्र ओ चुनावमे बालबालिकाके प्रयोग पूर्ण रुपसृे बन्द कैना बटैले रहिट ।

कार्यक्रममे राजनितिक दलके ओरसे नेपाली काँग्रेसके सचिव प्रकाश बम, नयाँ शक्तिके हिमालय विक्रम विष्ट, राष्ट्रिय प्रजातन्त्र पार्टीसे नर बहादुर शाही, विवेकशिल पार्टीके प्रवक्ता दानसिंह रावल ओ जनमोर्चा नेपालके नन्दराज भट्ट राजनितिक दलसे आब बालबालिकाहे चुनावमे प्रयोग नाइकैना प्रतिबद्धता जनैले रहिट ।

राष्ट्रिय मानव अधिकार आयोग क्षेत्रीय कार्यालयके प्रमुख दिपक जंगध्वज कार्कीके अध्यक्षतामे हुइल कार्यक्रमके संचालन सिविन नेपालके संयोजक माधव लोहनी ओ स्वागत मन्तव्य सिविन नेपाल बाँके के क्षेत्रीय संयोजक सिद्धराव पन्त करले रहिट । उहाँ स्थानीय चुनावमे बालबालिकाके प्रयोग व्यापक हुइलेसेफे अब्बे हुइना चुनावमे कम हुइल जनैलै ।