निर्वाचन क्षेत्र नम्बर ५ कैलाली काँग्रेस ओ वाम गठबन्धनहे विवेकशिलके चुनौती
धनगढी, ७ अगहन । कैलाली निर्वाचन क्षेत्र नम्बर ५ मे मुख्य राजनीतिक दलहुकनहे भर्खर स्थापना हुइल विवेकशिल साझा पार्टी टक्कर डेना डेखगिल बा ।
समृद्धि हमारे पालामे सम्भव बा ओ हमार भावी पुस्ता यहे माटीमे मसिना चुहाके सम्मानित ओ प्रतिष्ठित जीवन बाँचे पैना प्रयाप्त आधार बा कना विश्वासके साथ चुनावी मैदानमे उत्रल उ पार्टीके उम्मेदवारहुक्रे बरवार दलके उम्मेदवारहुकनहे टक्कर डेना डेखगिल बाटै ।
खासकैके क्षेत्र नम्बर ५ से प्रतिनिधि सभा सदस्य निर्वाचनके लाग उम्मेदवारी डेहल यहाँके लोकप्रिय पर्यटन व्यवसायी एंव कैलाली उद्योग वाणिज्य संघके पूर्व अध्यक्ष दिनेशराज भण्डारी ओस्टहि फेन यी क्षेत्रमे लोकप्रिय बाटै । जौनकारण उहाँ नेपाली काँग्रेसके सभापतिके गोसिनिया एंव नेतृ आरजु राणा देउवा ओ वामगठबन्धनके उम्मेदवार नारदमुनि रानाहे टक्कर डेना हुइल बाटै ।
स्थानीय तह विर्वाचनमे धनगढी उपमहानगरपालिकामे काँग्रेसके मेयर ओ उपमेयर बिजय हुइलपाछे नेपाली काँग्रेस आपन जीत सुनिश्चित रहल दावी करटी आइल बा । कलेसे हाले बनल नेकपा एमाले ओ माओवादी केन्द्रबीचके वामगठबन्धन क्षेत्र नम्बर ५मे दुई दुई पार्टीसे स्थानीय निर्वाचनमे पाइल मत लोकतान्त्रिक गठबन्धनसे ढिउर रहल दावी करटी आपन जीत सुनिश्चित रहल कहटी आइल बा । उम्मेदवार राना यहाँके स्थानीय हुइलओरसे फेन यहाँके थारु ओ रानाथारु समुदायके मत पैना आँकलन करटी आइल बाटै ।
मने स्थानीय तह निर्वाचनमे विवेकशिल साझा पार्टीके प्रदेश नम्बर ७ के संयोजक रहल व्यवसायी गोपाल हमाल स्थानीय तह निर्वाचनमे कांग्रेसके नृपबहादुर ओडसंग २७ सय मतअन्तरसे किल पराजित हुइल रहिट । मत काटजिना जोखिम तथा यहाँके चलायमान मतदाताके कारण आरजु ओ रानाके लाग भण्डारी फेन कम चुनौती नैहुइटै ।
विवेकशील साझा पार्टी प्रदेशसभा ‘क’ से थारु समुदायके नारायण चौधरी ओ ‘ख’ से धनगढीके होटेल व्यवसायी प्रकाश भट्टहे उम्मेदवार बनैले बा । उहाँहुक्रे फेन स्थानीयस्तरमे लोकप्रिय व्यक्ति हुइटै ।
ओस्त्रही किल नाई कैलाली–५ मे राना समुदायपाछे डोटीसे बसाईं सरके आइल हुकनके मत ढिउर रहल मानगिल बा । भण्डारी ओ भट्ट डोटीसे धनगढी झरल नेता हुइटै । ओहेकमारे फेन आरजुक् लाग ‘डोटी सेन्टिमेन्ट’ हे ‘क्यास’ कर्र्ना कर्रा बा ।
उम्मेदवार भण्डारी आपन जीत सुनिश्चित रहल दाबी कर्ठै । उहाँ कहठै–‘युवाहुक्रे परिवर्तन चाहले बाटै ओ मोर एजेन्डा फेन उहाँहुकनके चाहना सम्बोधन कर्ना बा । ओहेकमारे जित्नमे मै ढुक्क बाटु ।’
मतदाताहुक्रे करिब दुई दशकसे एक्के च्यानल हेरटी रहलओरसे ओहिहे बड्लेक् लाग आपन उम्मेदवारी आइल भण्डारीके कहाई बा । साथे उहाँ आपन लाग बरवार दल काँग्रेस ओ वामगठबन्धन कुछ फरक नैपर्ना बटैठै ।
‘यहाँके जनता दशकौंसे ओहे काँग्रेस, एमाले ओ माओवादीहे हेरटी आइल बाटै, आश्वासन वाहेक कुछ नैपैले हुइटै’उहाँ आघे कहलै–‘हम्रे पहिलेहिसे निजी क्षेत्रमार्फत यहाँके ढिउर विकास करटी आइल बाटी मने सक्कु क्षेत्रके विकास निजी क्षेत्रसे सम्भव नैरहलओरसे समग्र विकासके लाग राज्यके निकायमे पुगक पर्ना हुइलओरसे उम्मेदवारी डेले बाटु ।’
