कैलाली–३ मे चुनावी सरगर्मी बह्रल, विहानसे रातसम घरदैलो कार्यक्रममे उम्मेदवार
धनगढी, ५ अगहन । जिल्लाके औरे निर्वाचन क्षेत्र जस्टे थारु बाहुल्य निर्वाचन क्षेत्र नम्बर ३ मे फेन निर्वाचनके सरगर्मी बहुट बह्रल बा ।
यहे अगहन २१ गते हुइना प्रतिनिधि सभा ओ प्रदेश सभा सदस्य निर्वाचनके सरगर्मी बहुट बह्रल बा । यहेबीच राजनीतिक दलके नेता, उम्मेदवार तथा कार्यकर्ताहुक्रे आपन चुनावी कार्यक्रम कर्ना भ्याईनभ्याई हुइल बा ।
भौगोलिक रुपमे बरवार क्षेत्र रहल उ निर्वाचन क्षेत्रमे दलके नेता तथा उम्मेदवारहुक्रे दिनमे दर्जनौ चुनावी कार्यक्रम करटी आइल बाटै । उहाँहुक्रे विहानसे लेके रात १०/११ बजेसम फेन चुनावी प्रचारमे जुटल बाटै ।
उ निर्वाचन क्षेत्रमे खासकैके नेकपा एमाले ओ माओवादी केन्द्रके बाम गठबन्धन, नेपाली काँग्रेस, राष्ट्रिय जनता पार्टी, संघीय समाजवादी फोरम, नयाँ शक्ति नेपाललगायत दल आपन चुनावी गतिविधि तीव्र पर्ले बाटै ।
वाम गठबन्धनसे प्रदेश सभाके लाग उम्मेदवारी देहल वीरमान चौधरी अप्नेहुकनके लाग खैना, सुत्न, बैठ्नके कौनो ठेगान नैरहल बटैलै । रातदिन आमजनतामाझ रहल बटैटी उहाँ आपन पक्षमे बहुट मजा माहोल बनल बटैलै ।
बामगठबन्धनके साझा उम्मेदवार रहल, अप्ने सभासद रहल बेला करल काम, दिगो शान्ति ओ आर्थिक समृद्धिके खाका, स्थायी सरकार तथा निर्वाचन क्षेत्र नम्बर ३ के लाग बहुट एजेण्डासहित जनतामाझ रहल उहाँ जानकारी डेलै ।
ओस्टके राष्ट्रिय जनता पार्टीके प्रतिनिधि सभा सदस्य उम्मेदवार मिना चौधरी फेन अप्नेहुक्रे रातदिन नैकहिके आपन चुनावी कार्यक्रममे लागल बटैलैी । पहिचानके मुद्धा स्थापित कैना ओ आर्थिक समृद्धिके लाग अप्नेहुक्रे जनतामाझ गैल उहाँ बटैली ।
थरुहट मुद्धा स्थापित कैना, आर्थिक समृद्धि, दिगो शान्तिलगायत मुद्धा स्थापित कैना प्रतिवद्धताके साथ अप्नेहुक्रे फेन लागल बटैठै क्षेत्र नम्बर ३ से संघीय समाजवादी फोरमके प्रतिनिधि सभा सदस्यके उम्मेदवार भानुराम थारु । उहाँ कुछ दल सत्ता ओ कुछ दल स्थानीय तह निर्वाचनमे पाइल मतके दम्भ डेखैटी रहल बटैलै । मने वास्तविक मुद्धा के उठान करटा कना वात आमजनताहुक्रे जानेक पर्ना जरुरी रहल उहाँके कहाई बा ।
