कैलालीके ४१ थारु चुनावी मैदानमे

धनगढी, २ अगहन । यिहे अगहन २१ गते हुइना प्रतिनिधि ओ प्रदेश सभा निर्वाचनके लाग कैलालीके पाँच निर्वाचन क्षेत्रसे टमान पार्टीक ४१ जाने थारु उम्मेदवार चुनावी मैदानमे उत्रल बाटै ।

प्रतिनिधि ओ प्रदेश सभा निर्वाचनके लाग कैलालीसे ११९ जानेक उम्मेदवारी परलमे जिल्लाके तथ्यांङकमे ३४ दशमलव ४५ प्रतिशत थारु समुदायसे उम्मेदवारी परल डेखल बा । १२ जाने प्रतिनिधि सभा सदस्यके लाग ओ २९ जाने प्रदेश सभा सदस्यके लाग  उम्मेदवारी दर्ता कराके चुनावी डौरानमे बाटै ।  टमान राजनीतिक दलसे ३९ ओ दुई जानेक स्वतन्त्र उम्मेदवारी परल बा ।

कैलालीके क्षेत्र नम्बर १ से प्रतिनिधि सभाके लाग रेशमलाल चौधरी छाता चुनाउ चिन्ह लेके राजपा नेपालसे ओ भगतराम थारु हातले पक्रल मशाल चुनाउ चिन्ह लेके संघीय समाजवादी फोरम नेपालसे चुनाउ लरटै ।  क्षेत्र नम्बर २ से प्रतिनिधि सभा सदस्यके लाग राम प्रसाद चौधरी छाता चुनाउ चिन्ह लेके राजापा नेपालसे चुनाउमे उत्रल बाटै ।

क्षेत्र नम्बर ३ से प्रतिनिधि सभा सदस्यके लाग गौरीशंकर चौधरी गोलकारभित्तर हसिया हठौडा चुनाउ चिन्ह लेके नेपाल कम्यूनिष्ट पार्टी (माओवादी केन्द्र) से चुनाउ लरटै । ओस्टेक रामजनम चौधरी रुखुवा चुनाउ चिन्ह लेके नेपाली काँग्रेससे, भानुराम थारु हातले पक्रल मशाल चुनाउ चिन्ह लेके संघीय समाजबादी फोरम नेपालसे, मिनादेवी थारु छाता चुनाउ चिन्ह लेके राजपा नेपालसे ओ प्रेमराज चौधरी आयतकारभित्तर हर चुनाउ चिन्ह लेके एकिकृत राष्ट्रिय प्रजातान्त्रिक पाटी (राष्ट्रबादी)से चुनाउ चिन्ह लेके चुनावी मैदानमे दौरल बाटै ।

क्षेत्र नम्बर ५ से प्रतिनिधि सभा सदस्यके लाग नारादमुनी राना सूर्य चुनाउ चिन्ह लेके एमालेसे, लक्ष्मण थारु छाता चुनाउ लेके राजापा नेपालसे ओ विन्तीराम चौधरी मुठठी चुनाउ चिन्ह लेके देशभक्त जनगणतान्त्रिक मोर्चा नेपालसे चुनावी अभियानमे बाटै ।  ओस्टेक प्रदेश सभा सदस्य क्षेत्र नम्बर १ (क) के लाग कृष्णबहादुर चौधरी छाता चुनाउ चिन्ह लेके राजपा नेपालसे, गया प्रसाद कुश्मी जिप चुनाउ चिन्ह लेके स्वतन्त्रसे, चन्द्रप्रकाश चौधरी हातले  पक्रल मशाल चुनाउ लेके संघीय समाजवादी फोरम नेपालसे, जनकराज चौधरी रुखुवा चुनाउ चिन्ह लेके नेपाली काँग्रेससे, लालविर चौधरी सूर्य चुनाउ चिन्ह लेके एमालेसे चुनाउ लरटै ।

ओस्टे विनय चौधरी मुठठी चुनाउ चिन्ह लेके देशभक्त जनगणतान्त्रिक मोर्चा नेपालसे, बृजलाल चौधरी गैया चुनाउ चिन्ह लेके राष्ट्रिय प्रजातन्त्र पार्टीसे ओ सन्तोषकुमार कठरिया दहिना आँखी चुनाउ लेके नयाँ शक्ति पार्टीसे चुनाउमे उत्रल बाटै ।  प्रदेश सभा सदस्य क्षेत्र नम्बर १ (ख) के लाग दिनेशकुमार चौधरी हातले पक्रल मशाल चुनाउ चिन्ह लेके संघीय समाजवादी फोरम नेपालसे, नेप बहादुर चौधरी थारु गोलकारभित्तर हसिया हठौडा चुनाउ चिन्ह लेके नेपाल कम्यूनिष्ट पार्टी (माओबादी केन्द्र)से ओ लक्ष्मणकिशोर चौधरी छाता चुनाउ चिन्ह लेके राजपा नेपालसे प्रतिस्पर्धामे उत्रल बाटै ।

क्षेत्र नम्बर २  (क) के लाग जय प्रकाश दहित छाता चुनाउ लेके राजपासे, क्षेत्र नम्बर २  (ख) के लाग अरुण चौधरी रुखुवा चुनाउ चिन्ह लेके नेपाली काँग्रेससे ओ जंगप्रसाद बडायक छाता चुनाउ लेके राजपा नेपालसे चुनावी मैदानमे दौरल बाटै ।  प्रदेश सभा सदस्य क्षेत्र नम्बर ३ (क) के लाग पुरन चौधरी रुखुवा चुनाउ चिन्ह लेके नेपाली काँग्रेससे, विरमान चौधरी गोलकार हँसिया हठौडा चुनाउ चिन्ह लेके नेपाल कम्यूनिष्ट पार्टी (माओबादी केन्द्र)से, राजाराम चौधरी दहिना आँखी चुनाउ चिन्ह लेके नयाँ शक्ति पार्टीसे ओ जोगीराम चौधरी गोलकारभित्तर हर चुनाउ चिन्ह लेके राप्रपा (प्रजातान्त्रिक) से चुनाबी प्रचार प्रसारमे लागल बाटै ।

ओस्टेक क्षेत्र नम्बर ३ (ख) के लाग कृष्णकुमार चौधरी दहिना आँखी चुनाउ चिन्ह लेके नयाँ शक्ति पार्टीसे, सिता थारु छाता चुनाउ चिन्ह लेके  राजपा नेपालसे, रामनाथ चौधरी गोलकारभित्तर हर चुनाउ चिन्ह लेके राप्रपा (प्रजातान्त्रिक) से, ओ किसानबहादुर राना गिलास चुनाउ चिन्ह लेके राष्ट्रिय जनमोर्चासे चुनाउ लरटै ।

क्षेत्र नम्बर ४ (क) के से नेपाली काँग्रेसके यज्ञराज चौधरी रुखुवा चुनाउ चिन्ह लेके लरुइया थारु उम्मेदवार अकेली बाटै कलेसे (ख) मे थारु उम्मेदवार नाइहुइट ।  प्रदेश सभा सदस्य क्षेत्र नम्बर ५ (क) के लाग नेपाली काँग्रेससे जिवन राना, एमालेसे नेपालु चौधरी, राजपा नेपालसे जगन्नाथ चौधरी, विवेकशिल पार्टीसे नारायण चौधरी चुनावी मैदानमे भाग लेले बाटै कलेसे बालक (बच्चा) चुनाउ चिन्ह लेके स्वतन्त्र उम्मेदबार गंगाराम रानाफे चुनाउ लरटै ।

ओस्टेक क्षेत्र नम्बर ५ (ख) के लाग जनसमाजवादी पार्टी नेपालसे हसिया तारा चुनाउ चिन्ह लेके टीकादेवी चौधरी ओ नयाँ शक्ति नेपालके चुनाउ चिन्ह दहिना आँखी लेके रघुनाथ चौधरीफे चुनावी अभियानमे बाटै ।  सबसे ढेर आठ जाने राष्ट्रिय जनता पार्टी (राजपा) नेपालसे उम्मेदवारी डेले बाटै ।  मुलुकके भारी काङ्ग्रेससे छ, वाम गठबन्धन आबद्ध पार्टी नेकपा एमाले ओ नेकपा माओवादी केन्द्रसे ३÷३ जानेक उम्मेदवारी रहल बा । सङ्घीय समाजवादी फोरम ओ नयाँ शक्ति पार्टी नेपालसे ५÷५ जाने थारु उम्मेदवार बाटै । बाँकी और पार्टीसे उम्मेदवारी डेले बाटै । जातिय हिसाबसे पाछे परल थारु समुदायके महिलाहुकनके उम्मेदवारी भर बहुट न्यून बा  ।

उ समुदायसे चार जाने महिला केल टमान राजनीतिक दलसे चुनाव लरना अवसर पैले बाटै । जिल्लाभर करके टमान पार्टीसे १२ जे महिला उम्मेदवारी डेहलमे अङ्क गणितीय हिसाबमे थारु महिलाके प्रतिनिधित्व ३ दशलव ३६ प्रतिशत विल्गाइथ ।  नेपाली काङ्ग्रेससे क्षेत्र नम्बर ५ प्रदेश सभा (१) ओरसे जिवन राना थारु, राजपासे क्षेत्र नम्बर ३ मे प्रतिनिधि सभा सदस्य ओर मीना चौधरी ओ  प्रदेश सभा (२) ओर सीता थारुके उम्मेदवारी परल बा । क्षेत्र नम्बर ५ प्रदेश सभा (२) ओर जनसमाजवादी पार्टी नेपालसे टीकादेवी चौधरी उम्मेदवार बाटै ।

करिब ४२ प्रतिशत थारु समुदायके बसोबास रहल यी जिल्लामे कतिपय क्षेत्रमे थारु उम्मेदवारबीच केल प्रतिस्पर्धा हुइना डेखल बा । सबसे ढेर १३ जाने थारु उम्मेदवार रहल निर्वाचन क्षेत्र नम्बर ३ मे पूर्वमन्त्रीद्वय काँग्रेसके रामजनम चौधरी, माओवादी केन्द्रके गौरीशङ्कर थारु ओ सङ्घीय समाजवादी फोरमसे उम्मेदवारी देहल थरुहट आन्दोलनके अगुवा भानुराम थारुबीच प्रतिस्पर्धा हुइना विल्गाइथ । प्रतिनिधि सभा सदस्यके उम्मेदवार तीनु जाने विगतमे हुइल थरुहट÷थारुवान आन्दोलनमे सक्रिय रहिट ।

ओस्टेक करके आन्दोलनहे  टेक्के राजनीतिमे उदाइल रेशमलाल चौधरी क्षेत्र नम्बर १, लक्ष्मण थारु क्षेत्र नम्बर ५ मे प्रतिनिधि सभा सदस्यओर उम्मेदवार बाटै ।  दुनु जाने राजपासे उम्मेदवारी डेले बाटै । टीकापुर घटनाके आरोप लागल लक्ष्मण पुर्पक्षके लाग जेलमे ओ रेशम निर्वासित अवस्थामे बाटै ।