उम्मेदवारहुकनके नजरमे थारु मतदाता
धनगढी, ३० कार्तिक । निर्वाचन लच्क्याइटी रहल बेला उम्मेदवारहुकनके चुनावी कार्यक्रम थारु मतदाता केन्द्रीत हुइ लागल बा ।
जिल्लाके सक्कु निर्वाचन क्षेत्रमे दल तथा दलके उम्मेदवारहुक्रे थारु उम्मेदवारहुकन केन्द्रमे राख्के आपन चुनावी कार्यक्रम आघे सरटी रहल बाटै । जिल्लाके कुल जनसंख्याके ४८ प्रतिशत थारु समुदायके जनसंख्या रहलओरसे फेन निर्णायक मत थारु मतदाता रहल कहटी उम्मेदवारहुकनके केन्द्रमे परल हुइट ।
खासकैके कैलाली निर्वाचन क्षेत्र नम्बर ५ मे राजनीतिक दलहुकनके घेराबन्दीमे थारु, रानाथारु ओ डोटी जिल्लासे कैलाली बसाई सरल मतदाता रहल बाटै ।
यी क्षेत्रमे यी पालि ५७ हजार एक सय ९८ मतदाता थपके ९१ हजार आठ सय १८ पुगल बाटै । उ मध्ये करिब ३० हजार मत थारु, तथा रानाथारु समुदायके रहल बाटै ।
जौनकारण यी क्षेत्रसे उम्मेवारी डेहल काँग्रेस नेतृ तथा प्रधानमन्त्रीके गोसिनिया आरजु राणा देउवा, वामगठबन्धनके साझा उम्मेदवार नारदमुनी राना, थरुहट नेता तथा राजपाके उम्मेदवार लक्ष्मण थारु ओ साझा विवेकशिल पार्टीके उम्मेवार एंव धनगढी व्यवसायी दिनेशराज भण्डारी मतदाता फकैनामे केन्द्रीत हुइल बाटै । सक्कु उम्मेदवार आ–आपन पक्षमे माहोल बनल ओ जीत सुनिश्चित रहल दाबी फेन करटी रहल बाटै । जौन उम्मेदवार थारु मतदाताहुकन आपन पक्षमे नाने सेकी ओक्रे जीत सुनिश्चित हुइना डेखगिल बा ।
ओस्टके यी क्षेत्रके मतदाता एकदमे चलायमान रहल डेखगिल बाटै । प्रत्येक निर्वाचनमे फरक–फरक उम्मेदवार जिट्टी आइलओरसे फरक दृष्टिकोणसे विश्लेषण हुइ लागल बा ।
कैलाली बहुमुखी क्याम्पसके राजनीति शास्त्रके प्राध्यापक देवराज अवस्थी कहठै– ‘फरक समयमे फरक परिणाम आमजनता खोज्टी आइल बाटै ओ यी पटक फेन फरक परिणाम आइ कलेसे आश्चर्य मानेक पर्ना अवस्था नाई हो ।’
यहाँके चुनावी इतिहास हेर्लेसे २०४८ सालके आमनिर्वाचनमे कांग्रेसके नेता स्वर्गीय टेकबहादुर चोखाल जिटल रहिट । ०५१ सालमे भर एमाले नेता महेश्वर पाठक कांग्रेसहे टेसर बनैटी जीत हासिल करल रहिट । उ बेला एमालेके निकटतम प्रतिद्वन्द्वी राप्रपा बनल रहे ।
२०५६ सालमे आके फेनसे चोखालसे जीटल रहिट । ०६४ के पहिल संविधानसभा निर्वाचनमे भर माओवादीके लीला भण्डारी जीटल रहि । ०७० के दोसर संविधानसभामे एमालेके महेश्वर पाठकहे दोब्बर मतअन्तरसे प्रधानमन्त्री देउवा पराजित करल रहिट ।
देउवा डडेलधुरा रोजलपाछे कैलाली–५ मे हुइल उपनिर्वाचनमे कांग्रेसके पुष्करनाथ ओझा विजयी हुइल रहिट । देउवा कैलाली छोर्ना ओ हाल फेनसे देउवाके गोसिनिया यहे क्षेत्रसे चुनाव लड्ना हुइलओरसे देउवाके गोसिनियाहे मतदाता फकैना हम्मे–हम्मे परल बा । मतदाताहुकनके गुनासो मत्थर पारेक लाग उहाँ प्रधानमन्त्री देउवा देश छोरल नैहुइट, सुदूरपश्चिम फेन छोरल नैहुइट, दुइठो मध्ये एकठो छोरक पर्ना हुइलओरसेके कैलाली छोरल कहिके आपन गोसियाके बचाउ करटी आइल बाटी ।
यहिसे आघे जिल्लामे ६ निर्वाचन क्षेत्र रहे । हालके घटके पाँच ठो कायम हुइल बा । यहिसे यी क्षेत्र नम्बर ५ मे साविकके गदरिया गाविस थपल बा ।
स्थानीय तहके परिणामहे आधार मन्लेसे उ क्षेत्रमे कांग्रेससे बल्गर एमाले ओ माओवादी केन्द्रके गठबन्धन करिब ६ हजार मतसे आघे बा । उ कारण आरजुके मुख्य चुनौती वाम गठबन्धन बनल डेखजाइठ ।
