धनगढीमे अईसीके बनटा चक्रपथ
धनगढी, २२ कात्तिक । सघन शहरी विकास कार्यक्रम अन्तर्गत भन्सार–चटकपुर हुइटी राजपुरसमके चक्रपथ निर्माण सुरु हुइल बा ।
निर्माण व्यवसायीसे ठेक्का सम्झौता आघेक आर्थिक बरसके असारमे करलेसे फेन अब्बे आके निर्माणके काम सुरु करल हुइट । मोहना लडियाके किनारे किनार निर्माण हुइना चक्रपथ निर्माणके काम सुरु हुइलपाछे स्थानीय वासिन्दा खुशी हुइल बाटै ।
तीन प्याकेज कैके ३३ करोड ८२ लाखमे ठेक्का पाइल लुम्वीनी राजेन्द्र केसी जेभीके निर्माण कम्पनी केएस कन्ट्रक्सनसे पश्चिमी प्याकेजके निर्माणको काम सुरु करल हो ।
दुसरा प्याकेजके मनेहराके कमैया वस्ती डी गाउँ हुइटी सिद्धार्थ स्कुलके चत्रपथके निर्माणके काम नाइ हुइल अवस्थामे मनेहराके कालिका मन्दीर जाली हुइटी हुलाकी सडक खण्डके तिसरा प्याकेजके काम फेन सुरु करल निर्माण कम्पनी केएस कन्ट्रक्सनके सञ्चालक सुरेन्द्र पाल बटैलै ।
चक्रपथके संयुक्त सर्वे सम्पन्न हुइलसंगे सिमांकन ओ माटी भरानके काम सुरु करल बा । निर्माण कार्य सुरु हुइलपाछे नगरवासीहुक्रे विकास ओ समृद्धिके पहिल आधार सडक नै हुइल ओरसे समयमे निर्माण सम्पन्न कैना सुझाव डेले बाटै ।
झण्डे १४ मिटर चाकर चक्रपथहे गुणस्तरीय बनाइ परना बोराडाँडीके स्थानीय फुलदेवी धामी बटैली । स्थानीय जन प्रतिनिधिहुक्रे फेन चक्रपथ निर्माणके काममे अवरोध आइ नाइ डेना जनैले बाटै ।
निर्माणके काममे अइना वाधा हटैना सहयोग करटी तिव्र रुपमे चक्रपथ निर्माणके लाग सहयोग कैना धनगढी उपमहानगरपालिका वडा नम्वर ३ के वडाध्यक्ष वलवहादुर ऐर बटैलै ।
अगामी ५० बरसके लाग ३० मिटरके चाकर बनैना लक्ष्य सहित निर्माणके थालनी हुइल चक्रपथके दाया वायाँ ओर जग्गा रहल जग्गाधनीहुक्रे सहयोग करलेसे निर्माण कार्यमे कौनो अवरोध अइना नाइ डेखजाइठ् ।
मुआव्जा नाइ पैना हुइल ओरसे कारण स्थानीय वासिन्दाहुक्रे हुइ नाइ सेक्ना विरोधहे ध्यानमे राखके चक्रपथ निर्माण हुइना फाईदके बारेम जानकारी करैना आवश्यक डेखगैल बा ।
