धानके उत्पादनमे कमी नैअइना
धनगढी, १४ कात्तिक । चालु बरष बाढके कारण धान खेती प्रभावित हुइलेसे फेन कैलालीमे धान उत्पादनमे कमी नैअइना जिल्ला कृषि विकास कार्यालय जनैले बा ।
बाढ प्रभावित क्षेत्र बाहेक क्षेत्रमे धान खेती मजा हुइलओरसे गैल बरसके हाराहारीमे धानके उत्पादन हुइना उ कार्यालय जनाइल हो ।
जिल्लाभरसे संकलन करल तथ्यांक नैअइलेसे फेन उत्पादन घट्न अवस्था भर नैरहल वरिष्ठ कृषि विकास अधिकृत युवराज पाण्डेय बटैलै ।
बाढ प्रभावित क्षेत्र वाहेकके क्षेत्रमे गैल बरससे ढिउर उत्पादन हुइना डेखगिल बटैटी उहाँ समग्रमे धानके उत्पादनमे भर कमी नैअइना उल्लेख कर्लै । चालु बरस कैलालीमे ७१ हजार २५० हेक्टर जमिनमे धान खेती करगिल बा ।
सावन २८ गते आइल भीषण बाढसे भजनी ओ टीकापुर नगरपालिकामे किल ६०० हेक्टर जमिनमे लगाइल धानबाली पूर्ण रुपमे नष्ट हुइलपाछे भोकमरी हुइना कहटी किसान चिन्तित् हुइल बाटै ।
मने जिल्लाके समग्र उत्पादन अवस्था मजा रहलओरसे ओइसिन समस्या नैअइना जिल्ला कृषि विकास कार्यालयके दावी बा । आघेक बरस ७१ हजार २५० हेक्टर जमिनमे धान खेती करलमे तीन लाख ७५ हजार मेट्रिक टन धान उत्पादन हुइल रहे ।
कैलालीमे लागू हुइल प्रधानमन्त्री कृषि आधुनिकीकरण परियोजना अन्तर्गत धान ब्लक कार्यक्रम सञ्चालन करल कुछ ठाउँमे उत्पादन मजा हुइल बटागिल बा । परियोजना अन्तर्गत तत्काले फाइदा नैदेखगिलेसे फेन निकट दिनमे प्रति एकाई क्षेत्रफलसे कृषकहुक्रे धान खेतीमे ढिउर लाभ लेहे सेक्न वरिष्ठ कृषि विकास अधिकृत पाण्डेय बटैलै ।
जिल्लामे किसानहुक्रे धान काटके धमाधम धान डैनामे लागल बाटै । कतिपय क्षेत्रमे धान डैना काम फेन ओरागिल बा । कृषिमे आधुनिकीकरण कर्ना उद्देश्यसे गैल बरससे यहाँ प्रधानमन्त्री कृषि आधुनिकीकरण परियोजना लागू हुइल बा ।
यहेबीच, परियोजना अन्तर्गत आघेक बरस गहुँ सुपरजोन कार्यक्रम सञ्चालन करगिल यहाँ चालु बरससे तेलहन बालीके जोन कार्यक्रम सञ्चालन हुइना हुइल बा ।
